Indirimbo yubahiriza igihugu 'Rwanda Nziza' yongeye kuririmbwa muri 'Kigali International Peace Marathon' nyuma y'imyaka itatu, mu gihe Umunya-Kenya, Laban Korir, yongeye kwegukana iri rushanwa nyuma yo kuba uwa mbere muri Full Marathon y'ibilometero 42,1 mu bagabo.
Ni ku nshuro ya kabiri yikurikiranya Laban yegukanye iri rushanwa ryabaga ku nshuro yaryo ya 20 kuva mu 2005.
Uyu mwaka ryari ryiyandikishijemo abantu 14.480 mu byiciro bitatu birigize aho 1314 biyandikishije muri Full Marathon, 1836 biyandikisha muri Half Marathon naho 11.730 biyandikisha muri 'Run for Peace'.
Iri rushanwa ritegurwa n'Ishyirahamwe ry'Imikino Ngororamubiri mu Rwanda (RAF) ku bufatanye na Minisiteri ya Siporo, uyu mwaka ryari rifite insanganyamatsiko igira iti 'Isi yose i Kigali na Kigali ku Isi yose!'
Ni ku nshuro ya kabiri ryabaye riri ku rwego rwa gatatu rw'amarushanwa akomeye ku Isi 'Global Elite Label Status', ndetse ryongeye kugaragaramo abakinnyi bari mu 100 ba mbere ku Isi.
Minisitiri w'Ubuzima, Dr. Sabin Nsanzimana; Umuyobozi Mukuru Wungirije wa RCB, Candy Basomingera; Perezida wa RAF, Col (Rtd) Kayumba Lemuel; Minisitiri wa Siporo, Nelly Mukazayire; Minisitiri w'Abakozi ba Leta n'Umurimo, Christine Nkulikiyinka n'Umunyamabanga wa Leta muri Minisiteri y'Uburezi, Irere Claudette, bari mu bayobozi bitabiriye isiganwa mu cyiciro cya 'Run For Peace' kireshya n'ibilometero 10.
Umunya-Kenya, Laban Kipngetich Korir, yabaye uwa mbere muri Full Marathon y'abagabo yakoresheje amasaha abiri, iminota 18 n'amasegonda 26. Yakurikiwe na mwenewabo Langat Kipkirui naho Umunya-Ethiopia, Tadese Mamo Temechachu aba uwa gatatu.
Umunyarwanda Nizeyimana Alexis usanzwe ukinira Ikipe ya Nyaruguru AC, yabaye uwa gatanu akurikiye undi Munya-Kenya. Hitimana Noël wari mu Ikipe y'Igihugu hamwe na Ntirenganya Fidèle, ntiyakinnye kubera uburwayi.
Teresiah Omosa na we wo muri Kenya, yegukanye 'Kigali International Peace Marathon 2025' muri Full Marathon y'Abagore, akoresheje amasaha abiri, iminota 37 n'amasegonda 12.
Muri iki cyiciro kitarimo umukinnyi n'umwe w'Ikipe y'Igihugu y'u Rwanda, uwa kabiri yabaye Chala Kebene wo muri Ethiopia naho uwa gatatu aba Jeruto Ivyne Lagat wo muri Kenya.
Umunyarwandakazi Niyonkuru Florence yegukanye umudali wa Zahabu muri Half Marathon y'Abagore nyuma yo gukoresha isaha, iminota 13 n'amasegonda 57 ku ntera y'ibilometero 21,9.
Yakurikiwe na Musabyeyezu Adeline wari we Munyarwanda uheruka kwegukana uyu mudali mu 2022 naho Vivian Jepkogei wo muri Kenya aba uwa gatatu. Mu marushanwa, haririmbwa indirimbo yubahiriza igihugu cy'umukinnyi wegukanye umudali w'umwanya wa mbere.
Mu bakinnyi umunani ba mbere bahembwe muri iki cyiciro, harimo Abanyarwandakazi batandatu. Abandi batari mu myanya ibiri ya mbere ni Uwizeyimana Jeanne Gentille wa kane, Imanizabayo Emeline wa gatanu, Ibishatse Angélique wa gatandatu na Uwiduhaye Théophila wa karindwi.
Umunya-Kenya Njoroge Derrick Chege ni we wegukanye umudali wa Zahabu muri Half-Marathon ya 'Kigali International Peace Marathon 2025', aho yakoresheje isaha imwe, iminota itanu n'amasegonda 23.
Umunyarwanda Bigirimana Théophile usanzwe ukinira New Athletics Star, yabaye uwa gatatu akurikiye Kamutwire Gilbert wo muri Uganda.
Nkurunziza Emmanuel wakinnye ku giti cye yabaye uwa gatanu, Nsabimana Jean Claude w'Ikipe y'Igihugu aba uwa gatandatu naho Nizeyimana Sylvain wa APR AC aba uwa munani.
Umukinnyi wegukanye Full Marathon mu bagabo n'abagore yahawe ibihumbi 20$ [asaga miliyoni 28 Frw]. Uwa kabiri ahabwa ibihumbi 15$ naho uwa gatatu atwara 7500$.
Uwa kane yabonye 5000$, uwa gatanu abona 3000$ mu gihe kuva ku wa gatandatu kugeza ku wa munani bahawe 2000$, 1500$ na 1000$.
Mu basiganwe Igice cya Marathon [ibilometero 21,098], uwa mbere mu bagabo no mu bagore yahawe 5000$ [asaga miliyoni 7 Frw].
Uwa kabiri yabonye 4000$, uwa gatatu ahabwa 3000$. Kuva ku mwanya wa kane kugeza ku wa munani bahawe 2000$, 1000$, 800$, 500$ na 400$.
IGIHE
The post Umunya-Kenya Laban Korir n'Umunyarwandakazi Niyonkuru Florence begukanye Kigali International Peace Marathon appeared first on RUSHYASHYA.
