Mu Isi igezweho y'umupira w'amaguru, abatoza ba makipe akomeye ni bamwe mu bahembwa amafaranga menshi ugereranyije na mbere ndetse hari n'aho usanga ari bo bahembwa menshi cyane kurusha abakinnyi bakomeye batoza.
Ibi bituma nabo ubukungu bwabo buzamuka ndetse n'imitungo yabo muri rusange ugasanga ni abaherwe, kuri ubu tugiye kurebana abatoza 10 bakize kurusha abandi.
10. Arsene Wenger
Umunyabigwi w'ikipe ya Arsenal, Arsene Wenger niwe uza ku mwanya wa 10 mu batoza bafite amafaranga menshi aho abarirwa agera kuri miliyoni 38 z'amapawundi.Â
Mbere yuko ava mu ikipe ya Arsenal ndetse agahita ahagarika n'umwuga wo gutoza muri 2018, yinjizaga agera kuri miliyoni 8 z'amapawundi ku mwaka. Kuri ubu Arsene Wenger asigaye ashinzwe iterambere ry'umupira w'amaguru mu ishyirahamwe ry'umupira w'amaguru ku Isi (FIFA).
9. Jurgen Klopp
Uyu mutoza w'Umudage amaze gutoza amakipe 3 ariyo Mainz, Borussia Dortmund ndetse na Liverpool arimo kugeza ubu.
Jurgen Klopp ni umwe mu bagabo ikipe ya Liverpool itazapfa kwibagirwa bitewe nuko yayisubije mu guhatanira ibikombe ndetse kuva yahagera amaze kuyihesha icya Champions League, UEFA Super Cup, FIFA Club World Cup, Premier League, Carabao Cup ndetse na Emirates FA Cup.
Niwe uza ku mwanya wa 9 mu batoza bakize ku Isi aho afite agera kuri miliyoni 39 z'amapawundi. Muri Liverpool ahembwa miliyoni 15 z'amapawundi ku mwaka ndetse akaba yinjiza n'izindi miliyoni 6.7 z'amapawundi avuye mu kwamamaza.
8. Carlo AncelottiÂ
Umutoza wa Real Madrid niwe uza ku mwanya wa 9, nk'uko byigeze kwandikwa mu binyamakuru ubwo muri 2011 yatozaga Chelsea ariko akaza kwirukanwa agifite amasezerano yahawe ahera kuri miliyoni 28 z'amapawundi.
Muri Real Madrid kugeza ubu ahembwa miliyoni 9.5 z'amapawundi ku mwaka. Muri rusange Carlo Ancelotti mu mwaka utaha ushobora gutoza ikipe y'igihugu ya Brazil afite amafaranga agera kuri miliyoni 40 z'amapawundi.
7.Sir Alex Ferguson
Umwe mu batoza babayeho bakomeye mu mateka y'umupira w'amaguru, ubwo yatozaga ikipe ya Manchester United mu myaka ye ya nyuma yari afite amasezerano avuga ko nta mukinnyi ugomba guhembwa amafaranga menshi kumurusha.
Ndetse yewe no mu mwaka ushize ibinyamakuru byo ku mugabane w'Iburayi byanditse bivuga ko Sir Alex Ferguson kugeza ubu agihembwa mu ikipe ya Manchester United aho afata agera kuri miliyoni 2 z'amapawundi ku mwaka.
Uyu musaza w'imyaka 81 usibye amafaranga yakuye muri Manchester United kandi afite n'inganda zikora ibintu bitandukanye akaba ariyo mpamvu ariwe uza ku mwanya wa 7 mu batoza bakize aho afite amafaranga agera kuri miliyoni 56 z'amapawundi.
6.Steven GerrardÂ
Kuva yasezera ku mupira w'amaguru akaza no kwinjira mu kazi k'Ubutoza, kugeza ubu Steven Gerrard amaze gutoza amakipe 3 arimo Rangers, Aston Villa ndetse na Al-Ettifaq arimo kugeza ubu.
Aho ari muri Arabia Saudite, ahembwa agera kuri miliyoni 15 z'amapawundi buri mwaka ugahita unongeraho n'andi yakoreye ari umukinnyi aho mu ikipe ya Liverpool bamuhembaga agera ku 240,000 y'amapawundi ku cyumweru.
Ibi ni byo bituma ariwe uza ku mwanya wa 6 mu batoza bakize kuko muri rusange afite agera kuri miliyoni 71 z'amapawundi.
5. Zinedine Zidane
Uyu mufaransa wegukanye Ballon d'Or agikina yazaga mu bakinnyi bahembwa amafaranga menshi. Usibye umushahara kandi Zinedine Zidane yagiye abona amafaranga menshi binyuze mu kwamamaza akina muri Real Madrid no muri Juventus.
Ari umutoza mu ikipe ya Real Madrid, nabwo yahakuye amafaranga menshi kuko buri mwaka yishyurwaga miliyoni 19 z'amapawundi. Uyu mutoza uza ku mwanya wa 5 afite agera kuri miliyoni 99 z'amapawundi.
4.Pep Guardiola
Ku mwanya wa 4 turahasanga umwe mu batoza bagezweho bijyanye n'umupira w'amaguru nawo ugezweho. Uko afasha ikipe ya Manchester City kwegukana ibikombe, ni nako ikijya mu mufuka nacyo gitubutse.
Ku mwaka ahabwa agera kuri miliyoni 20 z'amapawundi nk'umushahara, ibintu bimugira umutoza muri Premier League uhembwa amafaranga menshi naho muri rusange akaba atunze agera kuri miliyoni 100 z'amapawundi.
3.Jose MourinhoÂ
Uyu munya-Portugal w'imyaka 60 niwe uza ku mwanya wa 3 mu batoza bakize ku Isi gusa amwe yagiye ayahabwa n'amakipe nyuma yo kumwirukana.
Muri 2021 ubwo yirukanwaga muri Tottenham Hotspur yahawe agera kuri miliyoni 15 z'amapawundi ahita asanga angana gutyo yahawe na Manchester United ndetse ukongeraho n'andi miliyoni 12 z'amapawundi yahawe na Chelsea ubwo yamwirukanaga muri 2015.
Kuri ubu aho atoza mu ikipe ya Roma ahabwa miliyoni 10 z'amapawundi ku mwaka naho muri rusange akaba atunze agera kuri miliyoni 100 z'amapawundi.
2. Diego Simeone
Umutoza wa Atletico Madrid, Diego Simeone niwe uhembwa amafaranfa menshi mu batoza bose ku Isi akaba ahabwa agera kuri miliyoni 30 z'amapawundi buri mwaka.
Aya mafaranga ahabwa mu ikipe ya Atletico Madrid amazemo imyaka 13 ni kimwe mu bimufasha kuza ku mwanya wa 2 mu batoza bakize ku Isi aho atunze agera kuri miliyoni 102 z'amapawundi.
1. Wayne Rooney
Umutoza wa Birmingham City yo mu cyiciro cya kabiri mu Bwongereza niwe uyoboboye abandi batoza mu kugira amafaranga menshi cyane. Aho atoza mu cyiciro cya 2, niwe uhembwaho menshi aho afata agera kuri miliyoni 1.5 y'amapawundi.
Amafaranga Wayne Rooney afite ntabwo ari ayo yakuye mu butoza gusa ahubwo harimo nayo yakoreye akiri umukinnyi haba mu buryo bwo kwamamaza ndetse n'umushahara yahabwaga na Manchester United aho ku cyumweru yafataga agera ku 25,000 by'amapawundi.
Muri rusange uyu mwongereza atunze miliyoni 125 z'amapawundi.
Wayne Rooney niwe mutoza ukize cyane ku Isi
