Mu ijoro ryo ku wa Gatanu tariki 28 Ukwakira 2022 nibwo amakuru yamenyekanye ko M23 yafashe ibi bice bitandukanye birimo n'ikigo cya gisirikare cya Rumangabo.
Abarwayi b'uyu mutwe bakimara gufata Rutshuru bahise bakoresha inama ebyiri zo guhumuriza abaturage ku bijyanye n'umutekano wabo n'ibyabo. Ndetse kuri ubu ibikorwa by'ubucuruzi byamaze gusubukurwa muri santeri y'ubucuruzi yo muri aka gace.
Utu duce twafashwe nyuma y'uko umunsi wo ku wa Kane warangiye kandi M23 ifashe umuhanda uhuza Goma na Rutshuru, imodoka z'ibicuruzwa ziragotwa
Amakuru dukesha Goma 24 avuga ko kuri uyu wa Gatandatu imirwano ikomereza mu teritwari ya Goma na Kibumba urugamba rukazakomereza ku gufata umujyi wa Goma.
Si ubwa mbere M23 yaba ifashe Goma kuko no mu 2012 byabaye ariko ikaza kurekura uyu mujyi kubera igitutu cy'amahanga n'uko Leta ya RDC yari yemeye ibiganiro.
Umutwe wa M23 uvuga ko wakiriye neza umwanzuro w'inama y'abakuru b'ibihugu bo mu Muryango w'Afurika y'Iburasirazuba (EAC) usaba ko imirwano ihagarara, ariko ko utiteguye kuva mu bice wafashe birimo n'Umujyi wa Bunagana wahereyeho.
Leta ya Congo ifata M23 nk'umutwe w'iterabwoba, wo ukavuga ko nta cyo ibyo bivuze kuri wo.
M23 ivuga ko yubuye imirwano kuko amasezerano yasinyanye na Guverinoma ya Congo atigeze yubahirizwa. Ivuga ko kuva mu 2013 yasinywa, abarwanyi bayo bategereje bihanganye aho bari mu buhungiro, bigeze mu 2017 nta kirakorwa bafata umwanzuro wo gusubira mu mashyamba.
Abarwanyi ba M23 mu 2013 bamwe bahungiye muri Uganda abandi mu Rwanda. Abari muri Uganda nibo basubiye ku rugamba mu mashyamba ya Virunga mu gihe abari mu Rwanda bacumbikiwe i Ngoma mu Ntara y'Iburasirazuba mu kigo kirindwa n'Igisirikare cy'u Rwanda.
Umuvugizi w'uyu mutwe Willy Ngoma avuga ko ubwo RDC yari yanze ko batahuka, bo bafashe umwanzuro bakava muri Uganda bagasubira mu mashyamba. Uko gutahuka ntabwo kwigeze kugwa neza RDC ahubwo yahise ifata intwaro itangira kurwanya M23.
