Abakobwa 20 bari mu mwiherero w'irushanwa rya Miss Rwanda 2021, bakoze imyitozo mu rwego rwo gukomeza kwita ku buzima bwabo.
Mu gitondo cya kare nta kindi kintu na kimwe barakora, abakobwa bari mu mwiherero w'irushanwa rya Miss Rwanda, barabyuka buri wese akambara umwambaro wo gukora imyitozo ngororamubiri. Nta n'umwe usigaye bari kumwe n'umutoza wabo, bakora imyitozo iba yateguwe uwo munsi yiganjemo iyo kurambura imitsi no kwiruka kugira ngo batangire umunsi bameze neza.
Gukora siporo bibafasha no kutazamura ibiro mu buryo butunguranye dore ko nabyo bigenderwaho kwitabira iri rushanwa harimo n'uko umuntu angana.
Umwiherero watangiye tariki 05 Werurwe 2021 abakobwa ari 37 ariko bukeye bwaho barahatanye 17 barataha ubu basigaye ari 20 ari nabo bazatorwamo Miss Rwanda 2021.
Mu mwiherero kandi abakobwa bahugurwa n'abantu batandukanye ku buzima bw'igihugu. Biteganyijwe ko uzarangira tariki 20 Werurwe 2021 ari nabwo hazatangazwa uwatsinze.
