Byabereye mu gice cyo gutanga impano mu muhango w'ihererekanyabubasha hagati ya guverineri mushya w'Intara y'Amajyepfo Kayitesi Alice n'Umunyamabana Nshingwabikorwa w'agateganyo akaba na guverineri w'umusigire w'iyi Ntara Gakire Bob.
Gakire Bob yahaye Kayitesi inkoni y'ubushumba, anamuha umupira w'ipipe y'igihugu Amavubi wanditseho nomero 6.
Impamvu Kayitesi Alice yahawe umupira wanditseho nomero 6 ni uko ari guverineri wa 6 ugiye kuyobora iyi ntara.
1. Kabera ;2006-2007
2. Fidele Ndayisaba : 2007-2011
3. Alphonse Munyentwari:2011-2016
4. Marie Louise Mureshyankwano : 2016-2018
5.Emmanuel Gasana : 2018- Gicurasi 2020.
6. Alice Kayitesi : Nyakanga 2020-...
Guverineri Kayitesi yabwiwe ko uyu mupira awuhawe nka guverineri akaba na kapiteni ugiye kuyobora ikipe y'Intara y'Amajyepfo.
Minisitiri w'Ubutegetsi bw'Igihugu Prof SHYAKA Anastase yabwiye Guverineri Kayitesi ko impamvu ahawe umupira wanditseho nomero 6 ari uko ari guverineri wa 6 ugiye kuyobora iyi ntara.
Prof Shyaka yasabye Guverineri Kayitesi kuzakomereza ku byiza abamubanjirije bakoze n'udushya bahanze.
Yagize ati “Nyakubwahwa Guverineri baguhaye numero ya 6 ni ukuvuga ko iyi ntara ntabwo aribwo ikivuka n'iterambere ryayo rifite uko ryagiye rizamuka. Ndangira ngo rero ibyagezweho, ari uwo usimbuye, ari abamubanjirije, buri wese ari iterambere yagiye yubaka ku iterambere ry'iyi ntara”.
Uwo usimbuye hari ibyiza yakoze, hari ibyo umuntu yakubakiraho, tubakire ku byiza, dukomeze ibyo byiza abo dusimbuye baba bakoze, tubyubakireho kugira ngo dukomeza urugendo ndetse n'abahanze umwimerere cyangwa udushya tukagira icyo tumara ni ugusubiza mu nganzo abantu bakareba ibyo byiza byose biba bihari tukabyubakiraho tugakomeza kuko kubaka ni ukugereka ibuye ku rindi”.
Gakire Bob wari Guverineri w'Umusigire yasabye guverineri mushya Kayitesi Alice kwita ku mishanga irimo uruganda rwa nyiramugengeri ruzatanga amashanyarazi angana na megawatt 80, kwita ku mushinga wa hoteli ya Muhanga, kwita kuri zone ikennye cyane yo ku ishyamba rya Nyungwe, yiswe ‘Kaduha,Gitwe corridor'.
Gakire yavuze ko yasuye iyi zone asanga koko ikennye cyane, gusa ngo hari ibikorwa biri gukorwayo birimo kaburimbo na umudugudu w'ikitegererezo.
Ati “Bibaye byiza kwizihiza ku nshuro ya 27 umunsi mukuru wo kwibohora byazabera muri iriya zone ya Kaduha –Gitwe corridor”.
Kayitesi Alice yavuze ko mu byo azashyiramo imbaraga harimo gufatanya n'uturere kwesa imihigo, kwita cyane ku mutekano no gukorera uturere ubuvugizi kugira ngo imishinga minini yihute.
source http://www.ukwezi.rw/mu-rwanda/Amakuru-anyuranye/article/Menya-impamvu-Guverineri-Kayitesi-yiswe-kapiteni-akanahabwa-umupira-wanditseho-nomero-6
