Umuco wacu muwurinde ico-Musenyeri Balthazar Ntivuguruzwa #rwanda #RwOT

Mu kwizihiza ku nshuro ya kabiri umunsi w'Umuco mu mashuri Gatolika abarizwa muri Diyoseze ya Kabgayi, Umwepisikopi w'iyi Diyosezi, Musenyeri Balthazar Ntivuguruzwa yasabye Urubyiruko rw'abanyeshuri biga mu mashuri ari muri Diyosezi abereye Umushumba, kubaha no gusigasira Umuco Nyarwanda bazirikana ko aribo barimu b'Umuco b'ejo hazaza, by'umwihariko ku bazabakomokaho.

Ni mu nama n'impanuro Musenyeri Balthazar Ntivuguruzwa yahaye Urubyiruko rwaturutse mu bigo by'amashuri 30 byo muri Diyoseze ya Kabgayi, aho bari mu gitaramo bizihiza Umunsi w'Umuco. Ibirori byabereye mu kigo cy'ishuri ryisumbuye kitiriwe Mutagatifu Berenadeta(ESB Kamonyi) ku wa 26 Gashyantare 2026, mu nsanganyamatsiko igira iti' Dukoreshe, tunoze Ikinyarwanda hose'.

Aganira n'abitabiriye kwizihiza uyu munsi w'Umuco, by'umwihariko urubyiruko rw'abanyeshuri, yagize ati' Turasaba abana bacu kwihatira kunoza imivugire n'imyandikire y'Ururimi rwacu rw'Ikinyarwanda. Turasaba mbere na mbere Ababyeyi n'Abarezi kubifashamo abana bacu turera'.

Yakomeje agira ati' Bana bacu, nanjye ndagira ngo mbibutse ko mugomba gukunda Umuco wacu, mugasobanuza, mukabaza kugira ngo murusheho kuwusobanukirwa kuko ejo ari mwebwe ndetse n'uyu munsi ariko cyane cyane ejo, mufite inshingano zo kuwutoza abandi, cyane cyane abazabakomokaho'.

Yagize kandi ati' Bana bacu rero, 'UMUCO WACU MUWURINDE ICO', maze koko uhore utubereye igicumbi cy'Amateka yacu, Igicumbi cy'Ubuzima bw'Igihugu cyacu n'Isoko y'imbaraga tuvomamo, zo kwiyubaka uyu munsi no kubaka ejo hazaza h'Igihugu cyacu ndetse n'ejo hazaza ha buri wese muri twe'.

Musenyeri Balthazar Ntivuguruzwa, yasabye by'umwihariko Abarezi gufasha abana kunoza imivugire n'imyandikire y'Ururimi rw'Ikinyarwanda. Yibutsa ko' kuvuga neza Ururimi rw'Ikinyarwanda si ikinegu, ahubwo ni ishema rikomeye'. Ahamya ko gutoza abana Umuco w'Ikinyarwanda ari ugutegura neza Abanyarwanda b'ejo hazaza ndetse no gutegura Abakirisito beza, bakunze kandi basobanukiwe n'Umuco wabo.

Dr. Nahayo Sylvère, Umuyobozi w'Akarere ka Kamonyi witabiriye ibi birori yashimiye Diyoseze ya Kabgayi kuba yarahisemo ko uyu munsi mukuru w'Umuco wizihirizwa muri aka Karere ayoboye. Yibukije ko Umuco ari isoko y'Ubuzima bw'Abanyarwanda, ko ariwo uranga buri Munyarwanda ukamurinda kwibagirwa Amateka y'Igihugu cye, ukanatuma buri wese agira icyerekezo ku hazaza he. Agira kandi ati' Gukunda Umuco, ni ugukunda ikiranga Igihugu cyacu, ni ugukunda Indangagaciro zacu, ni ugukunda Ubumwe bw'Abanyarwanda'.

Ashimangira ko gutoza abana umuco ari ukubatoza gukunda Igihugu, kubaha Ababyeyi, kubaha Imana no kubaha bagenzi babo, ndetse no kubatoza Indangagaciro zizatuma baba Abayobozi beza b'ejo hazaza, Abarezi beza, Ababyeyi beza mu gihe kizaza.

Yavuze ati' Umuco ni Urukingo ruturinda kwangizwa n'imico y'amahanga idahuje n'indangagaciro zacu'. Akomeza avuga ko kwizihiza umunsi w'Umuco, by'umwihariko mu mashuri ari uburyo bwo kwibuka ko ariwo musingi w'Uburezi, ko kandi Uburezi bwacu bugomba gushingira ku ndangagaciro z'Umuco nyarwanda.

Yasabye urubyiruko by'umwihariko abanyeshuri ati' Mukunde Umuco wacu, mwige kuwusigasira kandi mwige kuwushyira mu bikorwa mu buzima bwanyu bwa buri munsi'.

Muri iki gitaramo cyo kwizihiza umunsi w'Umuco cyateguwe na Diyoseze ya Kabgayi, abanyeshuri baserukiye ibigo 30 bibarizwa muri iyi Diyoseze biyerekanye mu mikino n'imbyino bitandukanye biranga umuco nyarwanda. Mu byo berekenye harimo; Imbyino zishingiye ahanini ku kwerekana Umuco Nyarwanda, Ikinamico igaruka ku muco, Imivugo, Amahamba n'Amazina y'Inka, Gusakuza, Gukirana, Kubuguza, Imisango yerekana uko mu muco Nyarwanda Ubukwe bwacyuzwaga n'ibindi.