Mu gihe umwuka wa politiki n'umutekano mu Burasirazuba bwo Hagati ukomeje kuba mubi, haravugwa amakuru ko Leta Zunze Ubumwe za Amerika zatakaje imwe mu ndege z'intambara zifasha izindi mu kirere mu bwoko bwa KC-135 Stratotanker mu kirere cya Iraq. Aya makuru yakwirakwiye ku mbuga nkoranyambaga no mu bitangazamakuru bitandukanye, n'ubwo hatarashyirwa ahagaragara ibisobanuro birambuye n'inzego za gisirikare za Amerika.
Amakuru atandukanye avuga ko iyo ndege ya mbere ishobora kuba yarahanutse nyuma yo kugabwaho igitero n'imitwe yitwaje intwaro ifitanye isano na Iran, harimo IRGC cyangwa imitwe y'inyeshyamba ikorera muri Iraq ishyigikiwe na Tehran. Bivugwa ko izo ngabo zishobora kuba zarashe imizinga iva ku butaka igamije kwibasira indege ziri mu kirere.
Ku rundi ruhande, hari indi ndege ya kabiri yo muri ubwo bwoko bwa KC-135R bivugwa ko yangiritse cyane ariko ikabasha kugwa ku kibuga cy'indege idakoze impanuka ikomeye. Abasesenguzi mu bya gisirikare bavuga ko ishobora kuba yangiritse mu gihe cy'igikorwa cyo kuzuza kerosene izindi ndege z'intambara mu kirere.
Hari kandi andi makuru akomeje kuvugwa ko izo ndege ebyiri zishobora kuba zaragonganiye mu kirere mu gihe zari mu gikorwa cyo guha kerosene izindi ndege. Icyo gikorwa gisanzwe gikorerwa mu kirere kigira ibyago iyo habaye ikibazo cy'itumanaho cyangwa ikosa ry'abapilote.
Kugeza ubu, nta tangazo riratangazwa n'ingabo za Amerika ku by'iyi nkuru. Icyakora, ibi byongeye kuzamura impungenge ku mutekano w'ibikorwa bya gisirikare bikorerwa mu kirere cya Iraq, cyane cyane mu gihe umubano wa Amerika, Israel na Iran ukomeje kuzamo ubushyamirane bukomeye.
Source : https://kasukumedia.com/indege-za-leta-zunze-ubuwe-za-amerika-zaguye-mu-kirere-cya-iraq/
