Abashakashatsi bari hagati y'ibihumbi 190 n'ibihumbi 200 ni bo batoranyijwe mu barenga miliyoni 10, ibigaragaza uruhare rw'aba bashakashatsi mu nzego babarizwamo.
Baje ku rutonde rwa Stanford-Elsevier 2025, rukorwa buri mwaka hakoreshejwe uburyo bwa Scopus bwifashishwa mu gukusanya amakuru ajyanye n'ubushakashatsi, ibitabo na raporo zitandukanye.
Rwahisemo abashakashatsi hakurikijwe uko ubushakashatsi bwabo bugera kuri benshi, uburemere bwabwo n'ingaruka nziza bwagize ku baturage.
Uru rutonde rwasohotse muri Nzeri 2025, bitandukanye n'izindi ntonde zibanda ku byakozwe gusa, iyi yo isuzuma ingaruka bwatanze.
Urutonde rusuzuma abashakashatsi babarirwa muri miliyoni nyinshi ku Isi banyujije ubushakashatsi bwabo mu binyamakuru bikomeye. Hashingirwa kandi no ku buryo ubushakshatsi bwabo bwifashishijwe n'abandi n'ibindi.
Stanford-Elsevier Global Ranking 2025 yakozwe na Kaminuza ya Stanford yo muri Leta Zunze Ubumwe za Amerika, rugaragaza ingaruka z'igihe kirekire z'ibikorwa bya siyansi ndetse n'uruhare rudasanzwe rwakozwe mu 2024.
Muri abo bashimiwe harimo Olivier Uwishema washinzwe Umuryango wa Oli Health Magazine Organization (OHMO), Prof. Léon Mutesa na Abraham Mitike Haileamlak bo muri Kaminuza y'u Rwanda, Corine Kakizi Karema wo muri Quality and Equity Health Care, ndetse na Prof. Ogechi Adeola usanzwe ari Umuyobozi Wungirije wa Kaminuza ya Kigali.
Urutonde ruriho n'abashakashatsi mpuzamahanga bakora cyangwa bakoze mu rwego rw'ubushakashatsi mu Rwanda, barimo Paul E. Farmer (yitabye Imana) washinze University of Global Health Equity (UGHE), hamwe na Torsten Schöneberg, Abebe Belayneh Bekele, Alemayehu Amberbir, na Chester Kalinda bafite aho bakorana na UGHE.
Urutonde ruranagaragaramo kandi Ayman Ahmed wo muri Minisiteri y'Ubuzima y'u Rwanda, Jennifer L. Rickard wo muri Bitaro bya Kaminuza bya Kigali (CHUK).
Harimo kandi David A. Shaye ukorera muri CHUK na Emmanuel Edwar Siddig wo muri Pan Africa Biomedical Institute.
Olivier Uwishema washinze OHMO ufasha abantu batandukanye gukora ubushakashatsi buteza imbere abaturage yavuze ko ntako bisa kwisanga ku rutonde ari kumwe n'umunyabigwi Paul Farmer.
OHMO yashinzwe mu 2018 yagize ingaruka ku barenga ibihumbi 200. Nko kuva mu 2024 kugeza uyu munsi bamaze kurenza ibihumbi 30.
Uwishema yegukanuye igihembo cy'inzobere mpuzamahanga yahize abandi, gitangwa n'Ikigo cya Amerika cyita ku bijyanye n'ubwonko, igihembo yanegukanye mu 2022.
Mu 2023 yashyizwe ku rutonde rwa Forbes rw'abantu 30 batarengeje imyaka 30 mu cyiciro cy'ubuvuzi n'ubushakashatsi, bakomeje guteza imbere uru rwego mu buryo bugaragara.
Ni igihembo cyaje gikurikira icya Loni nk'umwe mu bahanga bakiri bato 10 ku isi bagize uruhare mu guhangana na Covid-19, igihembo yahawe mu 2020.
Ati 'Ndishimiye cyane kandi ntewe ishema no kuba naramenyekanye mu bashakashatsi bangana na 2% bagize uruhare mu guteza imbere Isi, hamwe n'umunyabigwi Prof. Paul Farmer, n'abandi bashakashatsi b'inararibonye.'
Yashimangiye ko urutonde rwa Stanfordâ€"Elsevier 2025 rushimangira ingaruka z'igihe kirekire z'ubushakashatsi ndetse n'umusanzu watanzwe mu 2024.
Ati 'Ibi bintera imbaraga zo gukomeza kwagura imbibi mu bijyanye n'ubumenyi.'
Uwishema amaze guhabwa ibihembo mpuzamahanga bigera mu 10. Birimo icyo hahawe mu 2024 kizwi nka 'Diana Award', yegukanye gitangwa n'Ubwami bw'u Bwongereza nk'urubyiruko rukomeje gukora imirimo ikomeye mu guteza imbere urwego rw'ubuvuzi.
Muri Covid-19 Uwishema yafatanyije n'abo muri Kaminuza ya Havard mu ishuri ry'ubuvuzi, gusakaza amakuru ya Covidid-19 mu ndimi 26.
Mu 2023 yaje ku rutonde rwa Forbes Afica rw'abantu 30 b'indashyikirwa mu guteza imbere ubushakashatsi ku buzima.
Ubushakashatsi bwe bunyuzwa mu binyamakuru binyuzwamo ubushakashatsi bikomeye ndetse amaze kumurikira ubushakashatsi bwe mu bihugu birimo Canada, u Budage, Amerika, Hongrie, Espagne, u Bufaransa, u Bwongereza Korea y'Epfo n'ahandi.
