Gatebuke Claude ni umuhungu wa Gatebuke Justin, ukomoka mu yahoze ari Komine Kayove muri Segiteri Gishwati.
Dr. Bizimana yasobanuye ko Gatebuke Justin, Se wa Gatebuke Claude, abyarwa na Rwamwaga bahimbaga Kinyuka, akaba yari afite abagore babiri, uwitwa Nyambuga Agnès na Ntabugi ari na we nyina wa Gatebuke Claude. Bombi ni Abahutukazi.
Gatebuke Justin afite abavandimwe be barimo Enias Ukwitegetse wari umubazi w'amatungo mu isoko rya Nkora na Théophile Burindi wabaye Umwanditsi wa Komini Kayove imyaka myinshi, hakaba na mushiki we Nyiramakuba.
Ati 'Aba bose ntibigeze baba Abatutsi.'
Gatebuke Justin yize mu ishuri nderabarezi ry'i Rubengera no muri Kaminuza Nkuru y'u Rwanda mu Ishuri rikuru ryigishaga ubuvuzi rusange, akaba yari afite ikarita y'ishuri N°81/145.
Muri raporo y'umwaka w'amashuri 1982/1983 yakozwe na Ntakirutinka Charles wari Umunyamabanga Mukuru wa Kaminuza, ku wa 7 Gashyantare 1983, igaragaza urutonde rw'abanyeshuri b'iryo shuri, handitse ko Gatebuke Justin yigaga mu mwaka wa gatatu (Bac. III), akaba Umuhutu, wavutse mu 1956, muri Komini Kayove ku Gisenyi.
Gatebuke Justin arangije kaminuza, yakoreye Ikigo cy'Igihugu cy'Imibereho y'Abaturage (ONAPO), ayihagararira muri Perefegitura ya Gitarama na Byumba.
Dr. Bizimana ati 'Mu myaka yose Gatebuke Justin yamaze akora muri ONAPO, yari intagondwa ruharwa mu irondabwoko ryanga kandi ritoteza Abatutsi, akabifatanya n'inshuti ye Nyirasafari Gaudence wari Umuyobozi Mukuru wa ONAPO. Gatebuke Justin yari n'inshuti y'umugabo wa Nyirasafari Gaudence witwaga Phocas Habimana wabaye Umuyobozi Mukuru wa Radio y'abajenosideri RTLM. Uru rwango ni rwo rwatumye muri ONAPO hakoramo abakozi bake cyane b'Abatutsi kandi hakarangwa ubugome n'irondabwoko rikomeye Gatebuke Justin yagiragamo uruhare.'
Mu bakozi 252 bakoreraga ONAPO muri icyo gihe, barindwi gusa ni bo bari Abatutsi kandi na bo bari mu myanya iciriritse nk'abanditse, abashoferi n'indi yoroheje.
Ati 'Aho FPR itangirije urugamba rwo kubohora igihugu, aba Batutsi barafunzwe barengana, ndetse n'Abahutu bakekwagaho ukuri barafungwa. Nyuma y'amasezerano ya N'sélé hagati ya FPR na Guverinoma y'u Rwanda yateganyaga ko abafungiwe kubeshyerwa kwitwa ibyitso by'Inkotanyi bafungurwa nta mananiza, bakanasubizwa mu kazi, ONAPO yanze kubyubahiriza. ONAPO yirukanye abakozi bayo b'abagore babiri ibahora gusa ko abagabo babo babiri bari barafunzwe mu byitso kandi yanga kubasubiza mu mirimo yabo.'
Hari kandi abakozi babiri ba ONAPO Ishami ryo ku Gisenyi nabo bangiwe gusubira mu myanya yabo.
Dr. Bizimana ati 'Ngabo abategetsi bakoraga ako karengane, bahuje urwango na Gatebuke Justin, ubyara Gatebuke Claude, wihimbye uwacitse ku icumu ry'ubugome n'ubwicanyi byaranze Se.'
Yasobanuye ko hashingiwe ku bimenyetso by'irangamimerere rya Gatebuke Justin, ubyara Gatebuke Claude, hakiyongeramo ibikorwa by'ubugome n'urwango byikoma Abatutsi byaranze Gatebuke Justin akora muri ONAPO, afatanyije na Nyirasafari Gaudence n'umugabo we Phocas Habimana, bigaragara ko 'nta n'umwe muri bo wigeze aba Umututsi.'
Ati 'Nta n'umwe kandi muri bo wigeze atotezwa cyangwa ngo yicirwe abe azizwa Ubututsi nk'uko byakorewe abandi Batutsi muri Jenoside. Kuba rero Gatebuke Claude uba muri USA, yerura atihishiriye akabeshya icya Semuhanuka ko yarokotse Jenoside, ni uko afite gahunda nyinshi mbi z'ingenzi.'
Minisitiri Dr. Bizimana yavuze ko Gatebuke Claude agamije 'amaco y'inda yo kugira ngo atere impuhwe Abanyamerika bitume n'abatabizi bagira impuhwe bakamutega amatwi kandi bakamuha imfashanyo ashyira FDLR n'abandi barwanya u Rwanda.'
Yongeyeho ko ibikorwa by'uyu mugabo bigamije "kwimika iturufu isigaye ikoreshwa n'abandi benshi bavuka ku bajenosideri biyitirira Ubututsi ngo babone impamvu ntavuguruzwa yo gupfobya no kugoreka amateka ya Jenoside yakorewe Abatutsi no gusebya ubuyobozi bw'u Rwanda. Bituma abatazi ayo mayeri n'imiterere y'ibyo binyoma bagwa mu mutego woroshye wo gutega amatwi abo babeshyi no guha agaciro ibinyoma byabo, bizera koko ko ari abacitse ku icumu rya Jenoside yakorewe Abatutsi yemejwe ku rwego mpuzamahanga, yabaye Isi yose ibireba, nyamara ari ikinyoma n'amaco y'inda bigamije gukomeza ikwirakwizwa ry'ingengabitekerezo y'urwango rwateye Jenoside yakorewe Abatutsi.'
Umwanditsi kuri Jenoside yakorewe Abayahudi, Pierre Vidal-Naquet yanditse ko abahakana Jenoside bahora bashaka uburyo bwose batoneka abarokotse Jenoside.
Dr Bizimana yasobanuye ko kuba hari abiyitirira kuba abarokotse Jenoside kandi bakomoka ku babyeyi bayikoze bwadukanywe na bamwe mu bana b'abajenosideri, buri muri iyi gahunda mbisha yo gukomeza ikorwa rya Jenoside bakoresheje ikaramu n'imvugo z'ikinyoma, ubugome n'ubushinyaguzi, babizi neza kandi babishaka.
Ati 'Ntihagire uwo bayobya.'
