Ku isaha ya saa 16h00' ni bwo aya makamyo yari ahagurutse ku Murenge wa Rugerero ho mu Karere ka Rubavu, aho saa Kumi n'Ebyiri z'Umugoroba yari yinjiye mu mujyi wa Musanze, nyuma yo kumara hafi iminota 15 ku Murenge wa Busogo arimo kurindana, ngo agendere hamwe.
Aya makamyo yari akoze umurongo muremure, yavuye mu Mujyi wa Goma, akomereza mu muhanda wa Rubavu-Musanze-Kigali, mbere yo kwinjira muri Tanzania anyuze ku mupaka wa Rusumo. Byagaragaraye ko yari menshi kurenza aherutse gucyura ibindi bikoresho.
Iki ni icyiciro cya gatanu cy'ibikoresho bya SAMIDRC bicyuwe binyujijwe mu Rwanda. Ibya mbere byacyuwe tariki ya 29 Mata, biherekejwe n'abasirikare bake.
SAMIDRC yatangiye ubutumwa mu Ukuboza 2023. Yari igizwe n'abasirikare ba Afurika y'Epfo, Tanzania na Malawi.
Yahagaritswe n'inama y'Abakuru b'ibihugu bigize Umuryango wa Afurika y'Amajyepfo tariki ya 13 Werurwe mu rwego rwo gushyigikira ibiganiro bya Politiki bigamije amahoro mu karere.
