Youssef Rharb utakiri mu mibare ya Rayon Sports, ntashaka kuva i Kigali.
Ikipe ya Gorilla FC iri kuganira na Youssef Rharb, utakiri mu mibare ya Rayon Sports nyuma y'ubwumvikane buke na Murera ahanini bishingiye ku kubura umwanya wo gukina.
Uyu Munya -Maroc yagarutse muri Rayon Sports muri Nyakanga 2023 yitezweho gufasha iyi kipe kwitwara neza mu mikino Nyafurika ya CAF Confederation Cup yasezerewemo na Al Hilal Benghazi ku ijonjora rya kabiri ry'ibanze.
Amakuru dufite yemeza ko uyu musore yifuza kuguma i Kigali agashaka ikipe yakinira kugeza Shampiyona y'uyu mwaka irangiye akaba ari bwo yazasubira iwabo.
Ibiganiro biramutse bigenze neza Youssef Rharb yasinya muri Gorilla FC amasezerano y'igihe gisigaye muri shampiyona ngo igere ku ku musozo.
Uyu musore w'imyaka 23, yakiniye Rayon Sports bwa mbere amezi atatu gusa ubwo yayerekezagamo muri Nzeri 2021 nk'intizanyo ya Raja Casablanca yo muri Maroc. Yayisohotsemo muri Mutarama 2022 kubera ibyo yitaga gufatwa nabi na Murera icyo gihe yari ifite ubukungu butifashe neza kubera ingaruka zasizwe n'Icyorezo cya COVID-19.
Gorilla FC iri gushaka uyu mukinnyi ngo ayifasha mu gice gikorana na ba rutahizamu iri ku mwanya wa 14 n'amanota icyenda gusa inganya na Sunrise FC ya nyuma ku mwanya wa 16. Mu mikino 10 ya Shampiyona yakinnye, yatsinzemo umwe gusa, inganya itandatu mu gihe yatsinzwe itatu.
Â
Â
