Ikipe y'Igihugu ya Cameroun yatsinze Kenya amaseti 3-1 ku mukino wa nyuma w'igikombe cya Afurika cya Volleyball mu Bagore cyaberaga mu Rwanda ihita yegukana igikombe.
Ku munsi w'ejo hashize ku Cyumweru nibwo habaye imikino ya ½, umukino wa nyuma ndetse no guhatanira imyanya, ni nyuma yo kumara iminsi hafi itatu irushanwa ridakinwa kubera ikirego cyarezwe u Rwanda birangira runakuwe mu irushanwa.
Muri ½ Cameroun yatsinze Nigeria amaseti 3-0 ni mu gihe na Kenya yasezereye Maroc iyitsinze amaseti 3-0.
Iyi mikino yaberaga muri Kigali Arena ikaba yaje gusozwa Cameroun itsinze Kenya amaseti 3-1(25-21, 25-23, 15-25, 25-23). Iki kikaba ari igikombe cya gatatu kikurikiranya.
Maroc yabaye iya gatatu itsinze Nigeria amaseti 3-0 (25-19, 25-17, 25-18).
Tunisia ni yo yabaye iya gatanu nyuma yo gutsinda Repubulika Iharanira Demokarasi ya Congo amaseti 3-0 (25-17, 25-11, 25-20).
U Burundi bwasoreje ku mwanya wa karindwi, Sénégal iba iya munani mu gihe u Rwanda rwasezerewe mu irushanwa rwasoreje ku mwanya wa cyenda.
Abakinnyi bitwaye neza:
Umukinnyi wakoze serivisi nziza kurusha abandi (Best Server): Moma Bassoko (Cameroun)
Umukinnyi wazibiye abo bahanganye kurusha abandi (Best Blocker): Gladys Ekaru Emaniman (Kenya)
Umukinnyi wahize abandi mu gukinisha abakora amanota (Best Setter): Alexandra Erhart (Maroc)
Umukinnyi wagerageje gutsinda cyane (Best Attacker): Sharon Chepchumba Kiprono (Kenya)
Libero mwiza: Yousra Souidi (Maroc)
Umukinnyi warushije abandi guhagarika imipira y'abo bahanganye (Best Receiver): Mercy Moim (Kenya)
Umukinnyi mwiza w'irushanwa (MVP): Tchoudjang Nana Christelle (Cameroun)
Source : http://isimbi.rw/siporo/article/cameroun-yegukanye-igikonbe-cya-afurika-cyaberaga-mu-rwanda
