Mu kiganiro n'abanyamakuru, umuyobozi wa WHO, Tedros Adhanom Ghebreyesus , ku wa Kabiri tariki 14 Nzeri 2021, yavuze ko ikibazo cy'ubusumbane buri hagati y'ibihugu bikize n'ibikennye mu bijyanye no kubona inkingo cyakemuka, yongera gusaba inganda zikora imiti ko zajya zigira gahunda ya LONI izwi nka ‘COVAX' iy'ibanze, kuko yashyiriweho gusaranganya inkingo muri rusange.
Icyakora inganda zikora imiti harimo ‘Pfizer-BioNTech' na ‘Moderna' ntizigeze zigaragaza ko ziteguye guhindura uko zikora muri iki gihe, harimo gukomeza guha inkingo ibihugu bikize kurusha ibindi.
Mu cyumweru gishize, Tedros yasabye ko habaho ko ibihugu biba byigije inyuma gahunda yo gutanga inkingo zishimangira izabanje (Booster shots) ku bantu bafite ubuzima bwiza, nibura bikagera mu mpera z'uyu mwaka.
Ibihugu birimo Israel, u Bufaransa n'u Budage byatangiye gutanga urukingo rwa gatatu ku bantu bamwe na bwamwe. U Bwongereza ku ya 14 Nzeri 2021, ni bwo bwatangaje ko bugiye gutanga inkingo zishimangira izatanzwe mbere (boosters) ku muntu wese urengeje imyaka 50 ndetse no ku muntu waba ari muto, ariko afite ibindi bibazo by'ubuzima byatuma yakwibasirwa na Covid-19 cyane.
Muri iki cyumweru kandi , ni bwo muri Amerika hazaba ikiganirompaka mu ruhame, bareba niba ari ngombwa ko batanga inkingo zishimangira izabanje, ariko kandi muri iki cyumweru inzobere mu by'ubuzima zo muri ‘FDA' ndetse n'abahanga mu bya siyansi bo muri WHO, bari banditse muri ‘Lancet' ko umuntu uri mu myaka yo hagati (average person) adakeneye urukingo rushimangira izo yahawe.
Kugeza ubu, ngo Abanyafurika batagera no kuri 4% ni bo amaze guhabwa inking za Covid-19 zuzuye, kuko igice kinini cy'inkingo zigera kuri Miliyari 5.7 zakozwe, zihariwe n'ibihugu 10 gusa bikize ku isi.
Gahunda ya COVAX yananiwe kugera ku ntego hafi ya zose yari yiyemeje, none ubu yatangiye gusaba ininginga ibihugu bikize kugira ngo byemere gusaranganya inkingo.
Dr. Seth Berkley, Umuyobozi mukuru w'ihuriro ry'ibijyanye n'inkingo (Gavi), yavuze ko COVAX itegenya kubona inkingo za Covid-19 zigera kuri Miliyari 1.4 bitarenze uyu mwaka, izo ngo zikaba zitageze no kuri kimwe cya kane cy'ibyo yari yiyemeje.
Perezida wa ‘Afreximbank', Benedict Oramah yavuze ko kugura inkingo zishimangira izirimo gutangwa muri Afurika, byasaba ko hiyongeraho Miliyoni ziri hagati ya 500-600 z'Amadolari, haba habariwemo n'ibikoresho bijyanye n'izo nkingo, ngo bigasaba Miliyari y'Amadolari ku mwaka.
Strive Masiyiwa, intumwa ya Afurika yunze ubumwe (AU) mu bijyanye n'inkingo za Covid-19, yasabye ko habaho koroshya ibijyanye n'uburenganzira ku mutungo mu by'ubwenge, kugira ngo bifashe mu gukorera inkingo muri Afurika.
source : https://ift.tt/3Cio6fN
