Urubanza rwa Nsabimana Callixte, Rusesabagina na Herman Nsengimana ruratangira kuri uyu wa Gatatu #rwanda #RwOT

Umwanzuro wo guhuza izi manza wafashwe n'Urukiko Rukuru, Urugereko ruburanisha ibyaha byambukiranya imipaka ku wa 03 Ukuboza 2020, nyuma y'uko Paul Rusesabagina yiyemereye mu rukiko ko yateye inkunga umutwe wa FLN ushinjwa kwica, kwambura no kwangiriza abaturage mu turere twa Nyamagabe na Nyaruguru muri 2018-2019.

Icyumba cy'Urukiko rw'Ikirenga kiri mu Murenge wa Kimihurura mu Karere ka Gasabo nicyo kizaberamo uru rubanza mu kwirinda ko ababurana baburana begeranye kandi bitemewe muri iki gihe u Rwanda ruhanganye na COVID-19.

Umuvugizi w'Inkiko, Mutabazi Harrison, yabwiye RBA, ko bahisemo kwimurira urubanza i Kigali kuko ariho hari icyumba cyisanzuye kizafasha mu kubahiriza amabwiriza yo kwirinda COVID-19.

Yagize ati 'Impamvu rwimuwe ni ukubera ko hifuzwa ko hubahirizwa uburyo bwo kwirinda icyorezo cya COVID-19. Twahisemo n'ubundi buryo bw'ikoranabuhanga bw'uko abashaka barukurikirana mu buryo bw'ikoranabuhanga rya 'Live Streaming'. Ikindi tumaze iminsi dukoresha ikoranabuhanga, haba kwakira ibirego, gukurikirana imanza twagiye dukoresha ikoranabuhanga.'

Urukiko ruburanisha ibyaha by'iterabwoba ruri i Nyanza mu majyepfo y'u Rwanda nirwo rwategetse ko abantu 20 bo mu mutwe wa MRCD-FLN barimo na Paul Rusesabagina wari umukuru wa MRCD bahurizwa mu rubanza rumwe.

Umucamanza yavuze ko imanza zabo zigomba guhuzwa kuko ibyaha bakurikiranyweho by'iterabwoba no kurema umutwe w'ingabo utemewe babihuriyeho.

Ikindi ngo ni uko iyo imanza zisobekeranye ziregewe urukiko rumwe, perezida w'urukiko afite uburenganzira busesuye bwo gutegeka ko ziba urubanza rumwe.

Umucamanza yanavuze ko zitaburanishirijwe hamwe, ngo imikirize yazo ishobora kuvuguruzanya.

Mu iburanisha ryo ku itariki ya 26/11/2020, ubushinjacyaha bwari bwasabye ko imanza zabo zihurizwa hamwe.

Bwavuze ko bose ibyaha bakurikiranyweho bisa kandi bigendanye n'ibitero byagabwe n'uwo mutwe mu myaka ibiri ishize mu majyepfo ashyira uburengerazuba bw'u Rwanda.

Umwe mu baregwa, Nsabimana Callixte 'Sankara' wahoze ari umuvugizi wa FLN, yari yavuze ko icyifuzo cy'ubushinjacyaha gishimishije kuko na we yari yarabisabye.

Mbere yaho,mu kwezi kwa cyenda ubwo Perezida w'u Rwanda Paul Kagame yavugaga ku ifatwa rya Bwana Rusesabagina, yavuze ko imanza z'aba zizahuzwa.

Yagize ati: "... bazagira aho bahurira buri wese ashinje undi, ibyo yakoranye n'undi, cyangwa ibyo yakoresheje undi..."

Paul Rusesabagina amaze amezi arenga atanu mu Rwanda aburana ku bijyanye n'ifungurwa ry'agateganyo, nyuma yo gufatirwa mu Rwanda kubera kuba yarayoboye impuzamashyaka MRCD ifite umutwe wa FLN.



Source : http://umuryango.rw/amakuru/mu-rwanda/ubutabera/article/urubanza-rwa-nsabimana-callixte-rusesabagina-na-herman-nsengimana-ruratangira

Post a comment

0 Comments