APR FC isezerewe muri CAF Champions League itarenze ijinjora ry'ibanze, ni nyuma yo gusezererwa na Gor Mahia ku giteranyo cy'ibitego 4-3.
Urugendo rwa APR FC muri Champions League umwaka w'imikino wa 2020-2021 rurangiriye muri Kenya kuri Nyayo National Stadium nyuma yo gutsindwa na Gor Mahia 3-1.
Tariki ya 28 Ugushyingo 2020 nibwo APR FC yakiriye Gor Mahia mu ijonjora ry'ibanze rya Champions League iyitsinda 2-1.
Uyu munsi hari habaye umukino wo kwishyura kuri Nyayo National Stadium aho APR FC yasabwaga kunganya gusa yaje gutsindwa 3-1.
APR FC yatangiye ubona itari mu mukino yaje kubona penaliti ku munota wa 9 ku ikosa ryakorewe Niyomugabo Claude, Jacques Tuyisenge ayiteye arayihusha.
Sammy Onyango yaje kubonera Gor Mahia igitego cya mbere ku munota wa 13 ku mupira Manzi Thierry yakuye imbere y'izamu akawumwihera.
Mu gice cya mbere Adil yakoze impinduka Claude aha umwanya Bizimana Yannick.
APR FC yakomeje gushaka uko yishyura iki gitego ariko biragorana.
Mu gice cya kabiri APR FC yakoze impinduka Keddy na Ndayishimiye Dieudonne binjira mu kibuga havamo Djabel na Lague.
APR FC yakomeje gusatira maze ku munota wa 86, Keddy yishyurira APR FC ku ishoti rikomeye yatereye inyuma y'urubuga rw'amahina.
APR FC yari yizeye gukomeza mu kindi cyiciro, byaje kuyipfubana aho Rwabugiri Umar wari witwaye neza mu mukino yagowe n'iminota 5 y'inyongera.
Gor Mahia yaje kubona ibindi bitego bibiri mu minota y'inyongera bitsinzwe na Sydney Ochieng ku munota wa 91 na Nicholas Kipkirui ku munota wa 93 ku mupira wari uvuye muri koruneri. APR FC isezererwa ku giteranyo cy'ibitego 4-3.
