Kuri uyu wa Gatandatu tariki ya 7 Ugushyingo 2020, umukandida w'Abademokarate Joe Biden niwe wegukanye intsinzi mu matora yokuba perezida wa Leta Zunze Ubumwe z'Amerika nyuma yo gutsinda uwo bari bahanganye umunsi ku munsi wo mu ishyaka ry'Abarepubulikani ari we Donald Trump.
Biden yegukanye intsinzi mu matora y'umukuru w'igihugu nyuma yo kugeza ku majwi 270 y'intumwa umukandida akenera kugira ngo atorerwe kuyobora Amerika, bituma atsindira kuba perezida wa 46 wa Amerika.
Perezida mushya wa Amerika , Biden amaze kugeza ku majwi y'intumwa 284, mu gihe hagisigaye Leta enye zitararangiza igikorwa cyo kubarura amajwi zitandukanye zirimo Georgia, Nevada, Pennsylvania na Arizona. Naramuka azitsinze, bishobora kurangira agize amajwi 306.
Leta ya Pennsylvania igira Intumwa 20 zitora ariyo mpamvu Joe Biden yahise atsinda aya matora kuko yari afite amajwi 264 kuri 270 yasabwaga.
Mu butumwa Perezida mushya wa Leta zunze ubumwe za Amerika yanyujije ku rukuta rwe rwa Twitter, yavuze ko ari icyubahiro gikomeye kuba Abanyamerika bamutoreye kuyobora kiriya gihugu k'igihangange. Yagize ati:
'Amerika, ntewe icyubahiro no kuba mwampisemo ngo nyobore igihugu cyacu cy'igihangange. Akazi kari imbere yacu kazaba gakomeye, ariko ndabasezeranya iki: _Mwaba mwarantoye cyangwa mutarabikoze, nzakomeza ukwemera k'uko mugira umwanya muri njye.'
Biden w'imyaka 78, niwe uzaba ubaye Perezida wa Amerika ukuze kurusha abandi mu gihe azaba arahira muri Mutarama umwaka utaha 2021.
Bwana Biden yavuze ko Abanyamerika bamuhaye inshingano zo kurwanya icyorezo cya coronavirus, guhangana n'ubukungu butifashe neza, imihindagurikire y'ikirere ndetse n'irondabwoko ryabaye akarande.
Joseph Robinette Biden Jr yavukiye i Scranton muri leta ya Pennsylvania mu mwaka wa 1942.
Source : https://impanuro.rw/2020/11/07/joe-biden-atorewe-kuba-perezida-wa-leta-zunze-ubumwe-zamerika/
