Rayon Sports yamaze gutangaza abakinnyi 24 izakoresha mu mwaka w'imikino wa 2020-2021, ni urutonde ruriho Bashunga Abouba wari warasinyiye Mukura VS na rutahizamu Sugira Ernest.
Iyi kipe itangaje aba bakinnyi mu gihe yari iherutse gutangaza ko mu bakinnyi 43 yasigiwe na Munyakazi Sadate igomba gusigarana 21, 10 bakaguma mu bana ubundi abagera kuri 12 bagasezererwa, gusa amakuru ahari ni uko mu bana hagiyeyo 12 hagasezererwa 9.
Bigaragara ko iyi kipe yamaze gutandukana n'abakinnyi bagera ku 9 barimo umunyezamu Nsengiyumva Emmanuel Biganza batije muri Etincelles, Niyibizi Emmanuel bari baguze avuye muri Etoile del'Est, Uwiringiyimana Christophe wari wavuye muri Gicumbi FC, Olokwei Commodore, Irakoze Saidi, Niyomwungeri Mike, Tumushime Altijan, Habineza Olivier na Philpe Arthur ukomoka muri Cameroun(bari basanzwe ari abakinnyi ba Rayon Sports)
Iyi kipe mu bakinnyi izakoresha mu mwaka w'imikino wa 2020-2021, hagarayemo rutahizamu Sugira Ernest wa APR FC ariko ikaba yaramusabye kwishakira indi kipe.
Muri uru rutonde kandi hatunguranyemo umunyezamu Bashunga Abouba wari warasinyiye ikipe ya Mukura VS.
Dore abakinnyi 24 Rayon Sports izifashisha mu mwaka w'imikino wa 2020-2021
Abanyezamu: Kwizera Olivier, Bashunga Abouba na Hakizimana Adolphe.
Ba myugariro: Habimana Hussein, Iradukunda Axel, Kayumba Soter, Mujyanama Fidèle, Ndizeye Samuel, Niyigena Clement, Rugwiro Hervé.
Abakina Hagati: Nishimwe Blaise, Niyonkuru Sadjati, Ciza Hussein, Nizeyimana Mirafa, Nshimiyimana Amran, Sekamana Maxime, Mugisha Gilbert, Manace Mutatu na Oumar Sidibé.
Ba rutahizamu: Sugira Ernest, Drissa Dagnogo, Mudacumura Jackson, Nihoreho Arsène na Bigirimana Issa.
