Nsabimana Callixte alias Sankara wiyemereye ko yafatanije na Paul Rusesabagina mu bikorwa byo guhungabanya umutekano, uyu munsi agiye kuburana nyuma y'igihe gito hafashwe uyu mugabo uvugwaho ko yashakiraga inkunga abagirira nabi u Rwanda.
Ni ku kicaro cy'Urugereko rw'Urukiko Rukuru rushinzwe kuburanisha ibyaha Mpuzamahanga n'ibyambukiranya imipaka, hari kubera uru rubanza hifashishijwe ikoranabuhanga ry'amashuro riba uregwa ari aho afungiye i Mageragere ndetse n'ubushinjacyaha buri ku kicaro cyabwo ku Kimihurura mu gihe Inteko Iburanisha yo iri i Nyanza.
Muri uru rubanza rugiye kuba nyuma y'igihe gito hafashwe Paul Rusesabagina washinzwe uriya mutwe uri inyuma y'ibikorwa by'ubugizi bwa nabi byabereye i Nyabimata, hari abaje kuregera indishyi bari mu cyuma cy'iburanisha i Nyanza.
Muri Nyakanga 2020, Sankara yabwiye Urukiko ko Perezida wa Zambia, Edgar Lungu yateye inkunga umutwe wabo wagabye ibitero mu Rwanda ndetse n'andi mashyaka arimo MRCD ya Rusesabagina uherutse gufatwa binagizwemo uruhare na Zambia.
Bamwe mu batuye mu Murenge wa Nyabimata bagizweho ingaruka na biriya bitero barimo n'ababiburiyemo ababo, baherutse gutangaza ko bishimiye ifatwa rya Rusesabagina, bakavuga ko akwiye kuryozwa akangaratete yabaroshyemo.
Abaregera indishyi mu rubanza ruregwamo Nsabima Callixte wari wariyise Majoro Sankara, kugeza ubu ni barindwi (7) gusa abagaragaye mu rukiko uyu munsi ni batatu (3).
Mu iburanisha ry'uyu munsi, Nsabimana Callixte wiyise Sankara yasababye ko urubanza rwe rwahuzwa n'urubanza rwa Paul Rusesabagina yita 'Sebuja' ndetse na Herman Nsengimana kugira ngo bazafatirwe ibihano hamwe kuko ibyo bakoze babikoreye hamwe.
Nsabimana Callixte ahawe umwanya, yavuze ko yishimiye ifatwa rya Rusesabagina we yita Sebuja kuko ari we wari ukuriye uriya mutwe wamukoreshaga.
Sankara kandi yahise asaba Urukiko guhuza dosiye ye n'iya Rusesabagina ndetse n'iya Herman Nsengimana wari wamusimbuye ku mwanya wo kuvugira FLN na we akaza guhita afatwa.
Ati 'Rusesabagina na Herman bose tuburanishirijwe hamwe ubwo ni bwo butabera twaba duhawe nyakuri.'
Ni igitekerezo cyashyigikiwe n'uruhande rw'abaregera indishyi kuko ingaruka za biriya bitero, zikwiye no kujya ku mutwe wa Rusesabagina Paul.
Me Nduyiye Yousuf wunganira abaregera indishyi, yahise yaka ijambo, avuga ko bumvise ifatwa rya Rusesabagina uregwa ibyaha bimwe n'ibiregwa Sankara.
Ati 'Kandi ku munsi w'ejo twumvise bavaga ko ejo yaregewe urukiko, turasaba urukiko ko bazahuza izo dosiye.'
Umucamanza uyoboye Inteko Iburanisha uru rubanza yavuze ko aya makuru y'ifatwa rya Rusesabagina ari bwo bakiyumva. Ati 'Twe uwo muntu uri kutubwira ntabwo tumuzi, twe tuvuga ku bintu dufitiye dosiye.'
Umucamanza yasabye uregwa n'uhagarariye abaregra indishyi gutegereza ko Rusesabagina Paul aregerwa urukiko ubundi bakaba ari bwo batanga icyo kifuzo.
Umucamanza wahise ahindura ingingo, ahita agaruka ku kifuzo cy'Ubushinjacyaha bwasabye ko Dosiye ya Sankara yahuzwa n'iya Herman Nsengimana, avuga ko Urukiko rugiye kugisuzuma kuko we yamaze kuregerwa Urukiko ahita asubira urubanza.
Urukiko ruzasubukura uru rubanza tariki ya 01 Ukwakira 2020 hasomwa umwanzuro kuri iki kifuzo cy'Ubushinjacyaha cyo guhuza Dosiye ya Sankara n'iya Herman.
Sankara uregwa ibyaha 17, Ubushinjacyaha bwamaze gusobanura ikirego cyabwo hakaba hari hakurikiyeho ko uregwa agira icyo akivugaho.
Sankara araburana hifashishijwe uburyo bw'ikoranabuhanga
