Ubwongereza bwafatiye ibihano abantu 47 n’imiryango ibiri bushinja kuba ba “ruharwa” mu kubangamirara uburenganzira bwa muntu baranze imyaka ya vuba ishize.
Abantu bashinjwa kugira uruhare mu rupfu rw’umunyamategeko w’Umurusiya Sergei Magnitsky rwabaye mu mwaka wa 2009, imitungo yabo iri mu Bwongereza yafatiriwe kandi ntibemerewe kwinjira muri icyo gihugu.
Ndetse n’abategetsi bo muri Arabie Saoudite bashinjwa kugira uruhare mu rupfu rw’umunyamakuru Jamal Khashoggi rwabaye mu mwaka wa 2018 na bo bari kuri urwo rutonde rw’abafatiwe ibihano.
Dominic Raab, umunyamabanga ushinzwe ububanyi n’amahanga w’Ubwongereza, yavuze ko ibyo bihano byatanze “ubutumwa bwumvikana neza”.
Avugira mu nteko ishingamategeko umutwe w’abadepite, Bwana Raab yavuze ko Ubwongereza bwafatiye ibyemezo “abanyagitugu”.
Yongeyeho ko bwanafatiye ibyemezo abagerageza gukora ubucuruzi butemewe n’amategeko “bwungukira mu mafaranga yabonywe binyuze mu kumena amaraso”.
Uburusiya bwakangishije kwihimura ku Bwongereza bufata ingamba nk’izo ndetse buvuga ko ibyo bihano “nta cyo bivuze”.
Mu itangazo ibiro by’uhagarariye Uburusiya mu Bwongereza byasohoye, byagize biti:
“Uburusiya bufite uburenganzira bwo gusubiza ku cyemezo cy’uyu munsi [ejo ku wa mbere] kitari cyiza cyafashwe n’Ubwongereza, [bugasubiza] hashingiwe ku ihame ryo kugerera mu kebo kamwe”.
Iryo tangazo ryongeyeho ko ibyo bihano byafashwe n’Ubwongereza “bitazavugurura umubano hagati y’Uburusiya n’Ubwongereza”
The post Ubwongereza bwafatiye ibihano abacyekwaho kwica umunyamakuru wo muri Arabia saoudite appeared first on KASUKU MEDIA.
source https://kasukumedia.com/ubwongereza-bwafatiye-ibihano-abacyekwaho-kwica-umunyamakuru-wo-muri-arabia-saoudite/
