Yari impera y'icyumweru nziza ku bakinnyi b'abanyarwanda bakina hanze y'u Rwanda harimo ibyishimo bikomeye kuri Meddie Kagere wegukanye igikombe cya shampiyona muri Tanzania.
Uretse Simba SC yanegukanye igikombe cya shampiyona yakinnye ku munsi w'ejo hashize ku Cyumweru andi makipe yose akinamo abanyarwanda yari yakinnye ku munsi wo ku wa Gatandatu.
KMC ya Migi ni yo kipe ikinamo umunyarwanda itaratahukanye intsinzi, gusa na yo ntiyatsinzwe kuko yanganyije na Kagera Sugar 1-1 mu mukino w'umunsi wa 32 muri shampiyona ya Tanzania.
Yanga ikinamo abanyarwanda babiri, Haruna Niyonzima na Papy yari yakiriye Namungo ndetse iyitsinda ibitego 3-2, ihita ifata umwanya wa 2 iwambuye Azam FC yanganyije na Biashara United 1-1. Ni umukino Haruna Niyonzima yabanje mu kibuga mu gihe Papy yinjiye mu kibuga asimbura Molinga ku munota wa 78.
Ku munsi w'ejo hashize ku Cyumweru, wari umunsi w'amateka kuri Simba SC na Meddie Kagere, bagiye gusura Tanzania Prisons basabwa inota rimwe gusa bagahita begukana igikombe cya shampiyona, bakaba baraje kubigeraho nyuma yo kunganya 0-0. Ni umukino Meddie Kagere yabanje mu kibuga.
Simba SC yegukanye igikombe n'amanota 78, Yanga ya Papy na Haruna iri ku mwanya wa 2 n'amanota 60 irusha 1 Azam FC ya kabiri, KMC ya Migi iri ku mwanya wa 15 n'amanota 37, shampiyona y'iki gihugu irabura imikino 6 ngo isozwe.
Muri Sweden mu cyiciro cya 3 shampiyona yari yakomeje, Sandvikens IF ikinamo umunyarwanda Yannick Mukunzi yari yasuye Berga ndetse iyitsindira iwayo ibitego 2-0, ni umukino uyu musore w'umunyarwanda yakinnye.
Mu mikino 4 ya shampiyona imaze gukinwa, iyi kipe iri ku mwanya wa 7 n'amanota 7, mu gihe Sylvia ya mbere ifite 12.
source http://isimbi.rw/siporo/article/ibyishimo-bikomeye-kuri-meddie-kagere-yannick-haruna-na-papy-basoza-icyumweru-mu-kamwenyu-migi-ntibyegenda-neza
