Abaturage batujwe mu Mudugudu w'abatishoboye wa Gashinya, uherereye mu Murenge wa Nduba, Akarere ka Gasabo, baratabaza inzego z'ubuyobozi n'abafatanyabikorwa mu mibereho myiza y'abaturage, nyuma yo kubona ikibazo cy'abakobwa babyara imburagihe n'abandi batwita bakiri bato gikomeje gufata indi ntera.
Bamwe mu baturage bavuga ko ubukene bukabije n'inzara byabaye intandaro yo kuba hari abagabo bamwe bifashisha ibiribwa n'amafaranga make mu gushuka abana b'abakobwa, bakabatera inda bakiri bato, bigatuma bamwe babyara batarageza igihe n'abandi bagahura n'ingaruka zikomeye ku buzima bwabo n'umwana babyaye.
Umubyeyi utuye muri uyu Mudugudu yagize ati: 'Abana bacu bari mu bihe bikomeye. Inzara ituma bamwe babura amahitamo, bagafatwa n'abantu babizeza kubafasha, bikarangira batwite. Turasaba ko habaho ubufasha burambye.'
Abayobozi b'inzego z'ibanze bavuga ko ikibazo bakizi kandi ko hari ingamba zatangiye gufatwa zirimo gukangurira abaturage kurinda abana, gukurikirana abakekwaho kubangamira abana no gukorana n'inzego z'umutekano n'iz'ubuzima mu gufasha abahuye n'iki kibazo.
Abafatanyabikorwa mu mibereho myiza y'abaturage basabwa kongera imbaraga mu gufasha imiryango itishoboye, by'umwihariko mu gutanga inkunga y'ibiribwa, ubujyanama ku buzima bw'imyororokere, no gushyigikira gahunda zo kurinda abana.
Abaturage basaba ko hakongerwa ubufasha n'ubukangurambaga, kugira ngo abana b'abakobwa barindwe ihohoterwa, bagire amahirwe yo gukomeza amashuri no kubaho mu buzima butekanye.
Source : https://kasukumedia.com/gashinya-abaturage-baratabaza-kubera-inda-ziterwa-abangavu/
