Iki kimoteri kiri kubakwa Mu Mudugudu wa Ruhimbi, Akagari ka Ruganda Umurenge wa Kamembe mu birometero birenga nka 20 uvuye mu Mujyi wa Rusizi.
Ni cyo kimoteri kiri kuri uru rwego kizaba cyubatswe mu Ntara y'Iburengerazuba ndetse biteganyijwe ko kizajya gitunganya imyanda izajya iva no mu tundi turere. Biteganyijwe ko uruganda ruri kubakwa muri iki kimoteri ruzaba rufite ubushobozi bwo gutunganya metero kibe 42 buri munsi.
Umuyobozi w'Akarere ka Rusizi, Sindayiheba Phanuel yabwiye IGIHE ko iki kimoteri kizaba ari igisubizo mu kongera isuku mu mujyi wa Rusizi no kurengera urusobe rw'ibinyabuzima.
Ati "Imyanda yose yo mu mujyi wa Rusizi izajya ihakusanyirizwa, ivangurwemo ibora ikorwemo ifumbire itabora ibyazwemo ibikoresho bishobora kongera gukoreshwa. Ujya ubona ariya macupa ya pulasitiki ari mu kiyaga cya Kivu no mu mugezi wa Rusizi ariya yose azajya akusanywa akorwemo ibikoresho bishobora kongera gukoreshwa".
Iki kimoteri kiri kubakwa na Guverinoma y'u Rwanda binyuze mu Kigo cy'Igihugu gishinzwe amazi isuku n'isukura Wasac Group.
Umuvugizi wa WASAC Group, Bimenyimana Robert yabwiye IGIHE ko imirimo yo kubaka Uruganda ruyungurura amazi yanduye (Faecal Sludge Treatment Plant/FSTP) rufatanye n' Ikimoteri kigezweho (Modern Landfill) yatangiye muri Werurwe 2025 bikaba biteganyijwe ko izarangira muri Werurwe 2026.
Ati "Icyo kimoteri kizaba gifite ubushobozi bwo kuyungurura meterokibe 42 (m3/day) n' ibishingwe (solid waste) 13 Toni ku munsi, kikazaba kigizwe n' ibice bitandukanye birimo ahazajya hatunganyirizwa imyanda yo mu bwiherero (Faecal Sludge Treatment plant), ahazajya havangurirwa imyanda ibora n'itabora, ibora igakurwamo ifumbire (composting), itabora ishobora kongera gukoreshwa nk'amacupa n'impapuro bigakurwamo bikavugururwa (recycling)".
Icyo kimoteri gifatanye n'uruganda rutunganya imyanda yo mu bwiherero kizuzura gitwaye Frw arenga gato kuri miliyari 2,3Frw .
