Ku mugoroba wo kuri uyu wa kabiri tariki ya 12 Ukwakira 2021 nibwo ikipe ya Gicumbi FC ndetse na Etoile de l'Est yabonye itike yo gukina ikiciro cya mbere cy'umupira w'amaguru mu bagabo umwaka w'imikino wa 2021-2022, nyuma yo kwitwara neza ishyirahamwe ry'umupira w'amaguru mu Rwanda ndetse n'umuyobozi wayo bahaye ikaze aya makipe yombi.
Binyuze ku rubuga rwa Twitter ya FERWAFA bagize bati 'Turabashimiye Gicumbi FC na Etoile de l'Est ku ntambwe ishimishije muteye yo kuzamuka mu kiciro cya mbere Primus National League'.
Kuri Nizeyimana Olivier uyobora iri shyirahamwe ry'umupira w'amaguru mu Rwanda, nawe abinyujije kuri Twitter yashyimiye aya makipe yombi kuba yabashije kugera mu kiciro cya mbere kizakinwa guhera kuya 30 Ukwakira 2021.
Gicumbi FC yageze mu kiciro cya mbere isezereye ikipe ya Heroes FC ku giteranyo cy'ibitego 3-1 mu mikino yombi naho Etoile de l'Est yabigezeho imaze gusezerera Amagaju kuri Penaliti 6-5 nyuma yo kunganya ibitego bibiri kuri bibiri mu mikino ibiri.
Biteganyijwe ko kuri uyu wa gatanu aribwo hakinwa umukino wa nyuma wo kumenya ikipe itwara igikombe cyo mu kiciro cya kabiri uzakinwa hagati ya Gicumbi FC na Etoile de l'Est, ni umukino uteganyijwe kubera kuri Sitade Amahoro guhera ku isaha ya Saa cyenda.
Uyu mukino kandi uzabanzirizwa n'uzahuza Amagaju FC na Heroes wo uzakinwa ku isaha ya saa sita n'igice z'amanywa.
The post FERWAFA na Perezida wayo Olivier Nizeyimana bahaye ikaze Gicumbi FC na Etoile de l'Est zabonye itike yo gukina imikino y'ikiciro cya mbere 2021-2022 appeared first on RUSHYASHYA.
