Tusker ya Emery Mvuyekure, Strommen IF ya Twizere Buhake Clement, Zanaco ya Nizeyimana Mirafa na Simba SC ya Kagere Meddie niyo makipe y'abanyarwanda bakina hanze batsinzwe mu mpera z'icyumweru gishize.
Ku wa Gatanu w'icyumweru gishize shampiyona y'icyiciro cya mbere muri Georgia yari yakomeje bakina umunsi wa 26, FC Dila Gori ya Manzi Thierry yatsinze Telavi 2-0, ni umukino uyu myugariro w'umunyarwanda atari no muri 18 bakoreshejwe. Dinamo Batumi ifite amanota 56 niyo iyoboye shampiyona, Dila Gori ni iya 4 n'amanota 43.
Shampiyona y'icyiciro cya kabiri muri Sweden yari yakomeje mu mpera z'icyumweru gishize bakina umunsi wa 22. AFC Eskilstuna ya Rafael York yanganyije na Örgryte 2-2, ni umukino Rafael York yakinnye iminota 64 asimburwa na Linner. Iyi kipe iri ku mwanya wa 10 n'amanota 27, Värnamo ya mbere ifite 43.
Yannick Mukunzi yari mu kibuga akina iminota 90 mu mukino w'umunsi wa 22 wa shampiyona y'icyiciro cya 3 muri Sweden ikipe ye ya Sandvikens IF yatsinzemo Piteå ibitego 2-1, ni umukino wabaye ku wa Gatandatu w'icyumweru gishize. Iyi kipe ubu iri ku mwanywa wa 2 n'amanota 46, IF Brommapojkarna ya mbere ifite 53.
Ku munsi w'ejo hashize ku Cyumweru, Rwatubyaye Abdul yari mu kibuga ikipe ye ya FC Shkupi itsinda Akademija Pandev 3-1 mu mukino w'umunsi wa 8 wa shampiyona ya Macedonia. Iyi kipe ni nayo iyoboye urutonde n'amanota 17.
Mu cyiciro cya kane mu Bufaransa shampiyona yari yakomeje, ku wa Gatandatu Lyon La Duchere ya Ngwabije Bryane Clovis wakinnye iminota 90, yatsinze Saint-Priest ibitego 2-1. Iyi kipe iri ku mwanya wa 6 n'amanota 11, Grasse ya mbere ifite 17.
Mu cyiciro cya kabiri muri Norway, ku wa Gatandatu umunyezamu Twizere Buhake Clement yari ku ntebe y'abasimbura ubwo ikipe ye yatsindwaga na Aelesund 3-2. Iyi kipe iri ku mwanya wa 15 ubanziriza uwa nyuma n'amanota 16, HamKam ya mbere ifite 45.
Bizimana Djihad yari mu kibuga mu mukino w'umunsi wa 6 ikipe ye ya KMSK Deinze yaraye inganyijemo na Virton 1-1. Iyi kipe iri ku mwanya wa 4 n'amanota 10, Westerlo ya mbere ifite 14.
Ntabwo Nizeyimana Mirafa yari mur 18 bakoreshejwe na Zanaco FC mu mukino wa shampiyona iyi kipe yatsinzwemo na Kankola Blades 2-0 ku wa Gatandatu. Zanaco iri ku mwanya wa nyuma n'amanota 0(ifite imikino 2 itarakina), Green Buffaloes ya mbere ifite amanota 10.
Emery Mvuyekure ntabwo yari muri 18 bakoreshejwe na Tusker ku munsi wa mbere w'iyi shampiyona yatangiye mu mpera z'icyumweru gishize, ku munsi w'ejo batsinzwe na AFC Leopards 1-0.
Muri iyi shampiyona kandi, Bandari FC y'umutoza Cassa Mbungo Andre yatangiye inyagira Mathare United 3-0, iyi kipe ni nayo iyobaye shampiyona ya Kenya.
FAR Rabat ya Imanishimwe Emmanuel Mangwende wari wabanje ku ntebe y'abasimbura, yaraye inganyije na RSB Berkane 1-1 mu mukino w'umunsi wa 3 wa shampiyona y'iki gihugu. Iyi kipe iri ku mwanya wa 9 n'amanota, Raja Casablanca ya mbere ifite 9.
Ntabwo Meddie Kagere yari mu bakinnyi Simba SC yakoresheje itsindwa na Yanga 1-0 mu mukino w'igikombe kiruti ibindi mu gihugu cya Tanzania wabaye ku wa Gatandatu tariki ya 25 Nzeri.
