Umugore wo muri Afghanistan yabyariye mu ndege mu gice gitwarwamo imizigo cy'indege, bageze ku kibuga cy'indege cya gisirikare cy'Amerika cya Ramstein Air Base mu Budage.
Nk' uko BBC dukesha aya makuru ibivuga , uyu mugore wari urimo guhungishwa mu ndege akuwe muri Afghanistan muri iki gihe cy'akavuyo gikomeje muri icyo gihugu, yabyaye umwana w'umukobwa ari muri iyo ndege.
Ingabo z'Amerika zirwanira mu kirere zavuze ko uwo mugore w'Umunya-Afghanistan yagiye ku bise berekeza ku kibuga cy'indege cya gisirikare cy'Amerika cya Ramstein Air Base kiri mu Budage.
Abaganga binjiye mu ndege ubwo yari imaze kugera ku kibuga bamufasha kubyara uwo mwana bari mu gice gitwarwamo imizigo cy'indege.Umwana na nyina bivugwa ko bameze neza aho bari kwitabwaho ku ivuriro riri hafi aho.
Abanya-Afghanistan babarirwa mu bihumbi bari hanze y'ikibuga cy'indege mpuzamahanga cyo mu murwa mukuru Kabul, nyuma y'iminsi ishize aba Taliban bigaruriye igihugu.
Kugeza ubu abasirikare b'Amerika ni bo bagenzura ikibuga cy'indege cya Kabul.
Abantu bagera hafi ku 17,000 ni bo bamaze guhungishwa mu ndege n'igisirikare cy'Amerika bakuwe kuri icyo kibuga, nkuko ibiro bya perezida bya White House byabitangaje ku wa gatandatu.
Joe Biden Perezida wa Amerika yashyizeho igihe ntarengwa cy'itariki ya 31 y'uku kwezi kwa munani ngo ingabo z'Amerika zose zibe zavuye muri Afghanistan.
