Mu burengerazuba bwa Kenya abantu batari munsi ya 13 bahitanywe n' imodoka y' ikamyo yari itwaye ibitoro irabirinduka irashya. Ibi byabaye kuri uyu wa Gatandatu tariki ya 17 Nyakanga 2021 mu masaha y' ijoro.
Amakuru impanuro ikura kuri BBC avuga ko iyo mpanuka yabaye ubwo umushoferi wari utwaye iyi kamyo yageragezaga gukatira indi kamyo mu muhanda uba urimo uruvunge bw' abantu hagati ya Kisumu na Busia.
Amakuru akomeza avuga ko ubwo iyo impanuka yabaga abantu bahise bafata amajerikani bajya kuri iyo kamyo yari yabirindutse baravoma ubwo yari imaze guturika.
Abantu bagera kuri 11 , barimo n' abana , barembeye mu bitaro nyuma yo kugira ubushye bukomeye cyane.
Bivugwa ko byafashe hafi amasaha abiri kugira ngo abazimya umuriro bagere aho iyo mpanuka yabereye , hafi y' umujyi wa Malanga wo mu Karere ka Siaya_ ku ntera ya Kilometero hafi 315 mu Majyaruguru ashyira uburengerazuba bw' umurwa mukuru wa Kenya i Nairobi.
Moreso Chacha, Umukuru wa Polisi w'aho iyo mpanuka yabereye , yagize ati:' Ntabwo twashoboye kubona imodoka izimya umuriro ivuye mu Karere ka Siaya kuko iri i Nairobi'.
Yakomeje avuga ko abazimya umuriro bavuye mu Karere baturanye bakaza kubafasha.
Mu gihugu cya Kenya abantu hafi 3, 000 bahitanwa n' impanuka zo mu mihanda.
Source : https://impanuro.rw/2021/07/19/ikamyo-yari-itwaye-ibitoro-yaturitse-ihitana-abantu-13-muri-kenya/
