Kubera ubwiyongere bw'icyorezo cya Coronavirus mu Rwanda, amashyirahamwe y'imikino y'amaboko mu Rwanda, Volleyball na Basketball(FRVB na FERWABA), bafashwe umwanzuro wo guhagarika ibikorwa by'iyi mikino byari biteganyijwe mu minsi iri imbere kugeza igihe kitazwi.
Ni umwanzuro aya mashyirahamwe yafashe agendeye ku mabwiriza mashya ya Minisiteri ya Siporo yo kwirinda icyorezo cya Coronavirus.
Itangazo rya FRVB riragira riti 'mu rwego rwo kubahiriza amabwiriza n'ingamba nshya zo kwirinda no gukumira COVID-19, ubuyobozi bw'Ishyirahamwe Nyarwanda rya Volleyball, FRVB buramenyesha abanyamuryango n'Abanyarwanda muri rusange ko amarushanwa yose ategurwa na FRVB ndetse n'imyitozo ya Volleyball bibaye bisubitswe. Bizasubukurwa hakurikizwa amabwiriza n'ingamba nshya bizagenwa n'inzego zibifitiye ububasha.'
'Ubuyobozi burasaba abanyamuryango, abakunzi ba Volleyball n'Abanyarwanda muri ruasange gukaza ubwirinzi no kubahiriza amabwiriza yo kwirinda COVID-19.'
Bwasoje buvuga ko amarushanwa azasubukurwa akomereza aho yari ageze.
Muri Nyakanga hari hateganyijwe irushanwa ryo kwizihiza umunsi wo Kwibohora, Irushanwa rya Gisagara n'irya UTB ni mu gihe shampiyona yagombaga gutangira mu kwezi kwa Kanama.
Muri uku kwezi kandi kwa Nyakanga hari hateganyijwe World Tour Beach Volley yagombaga kuzabera i Rubavu.
Ishyirahamwe rya Basketball naryo rikaba ryasohoye itangazo rivuga ko ibikorwa bya Basketball byahagaritswe.
Iragira iti'FERWABA iratangaza isubikwa rya shampiyona, kugeza igihe hazatangazwa na Guverinoma y'u Rwanda izindi ngamba zo kurwanya Covid-19 zikurikira izo ku wa 29 Kamena 2021.'
Umuyobozi Nshingwabikorwa wa FERWABA, Landry Jabo, yagize ati "Twafashe iki cyemezo ku bw'ubuzima bw'abantu mbere na mbere. Ni mu nyungu za buri wese kuzana shampiyona hagendewe ku mabwiriza ya Guverinoma.'
Ubuyobozi bw'iri shyirahamwe buvuga kandi ko bwafashe iki cyemezo mu rwego rwo kubungabunga ubuzima bw'abakinnyi n'abandi bose bafite aho bahuriye n'amakipe.
FERWABA ikaba ifashe iki cyemezo nyuma y'uko shampiyona yari yaratangiye ndetse imikino imwe n'imwe yari yarakinwe.
Source : http://isimbi.rw/siporo/article/amarushanwa-ya-basketball-na-volleyball-yahagaritswe-mu-rwanda
