Rayon Sports ikomeje imyitozo yitegura shampiyona y'icyiciro cya mbere mu Rwanda izatangira mu kwezi gutaha, ni mu gihe abakinnyi babwiwe ko mbere y'uko itangira bazaba bamaze kwishyurwa ibirarane bafitiwe.
Rayon Sports iri mu itsinda B kumwe na Kiyovu Sports, Gasogi United na Rutsiro.
Iyi kipe ikaba irimo gukorera imyitozo ku kibuga cyo mu Nzove ndetse ni n'aho irimo gukorera umwiherero yitegura shampiyona, ni umwiherero yatangiye tariki ya 12 Mata 2021.
Amakuru ISIMBI yamenye yavuye mu bakinnyi b'iyi kipe ni uko mbere y'uko bajya mu mwiherero abakinnyi babanje kugeza ku bayobozi bayo impungenege z'uko batava mu rugo ntacyo basigiye umuryango, ni mu gihe bamwe bishyuza ikipe n'amafaranga baguzwe batarabona.
Ubuyobozi bw'iyi kipe bukaba bwarabwiye aba bakinnyi ko bakwihangana kuko bazajya gutangira shampiyona amafaranga yabo barayabonye yaba ibirarane ndetse n'abatarabonye ayo baguzwe.
Biteganyijwe ko shampiyona izatangira tariki ya 1 Gicurasi isozwe tariki ya 29 Kamena 2021.
Source : http://isimbi.rw/siporo/article/rayon-sports-ikomeje-imyitozo-abakinnyi-bahawe-inkuru-nziza
