Arsenal yari yatsinze ibitego 3-1 mu mukino ubanza wabereye mu Bugereki yaje iri ku rwego rwo hasi cyane inanirwa gutsinda Olympiakos y'abakinnyi 10 mu mukino wo kwishyura wabereye ku kibuga cya Emirates.
Igitego cya rutahizamu Youssef El-Arabi ku munota wa 51 w'umukino cyahaye Olympiacos imbaraga zo gushaka ibindi 2 ngo isezerere Arsenal nkuko yabigenje mu mwaka ushize muri 1/32 ariko biba iby'ubusa.
Ba rutahizamu ba Arsenal barimo Aubameyang na Pepe babonye amahirwe menshi yabazwe ariko ntibabasha kwinjiza ibitego ahanini biturutse no ku kwirara ko bakomeje.
Olympiacos yarangije umukino ari abakinyi 10 kuko myugariro Ousseynou Ba yahawe amakarita 2 y'umuhondo mu minota ya nyuma y'umukino yavuyemo umutuku.
Ku rundi ruhande,Manchester United yari yanganyije igitego 1-1 na AC Milan mu mukino ubanza,yakoze ibyo yasabwaga mu mukino wo kwishyura iyitsinda igitego 1-0 cyatsinzwe na Paul Pogba ku munota wa 48 w'umukino.
Pogba umaze iminsi mu mvune, yinjiye mu kibuga ku munota wa 46 asimbuye Marcus Rashford ndetse uretse n'iki gitego yatsinze yafashije United mu gushaka imipira ndetse no kureama amahirwe.
Tottenham yabaye ikipe ya 2 yo muri Premier isezerewe mu buryo bugayitse nyuma ya Leicester yasezerewe ubushize,kuko mu mukino ubanza yatsinze ibitego 2-0 ku kibuga cyayo ariko mu wo kwishyura nayo yishyuwe ibyo bitego hitabazwa iminota 30 y'inyongera.
Tottenham yari ku rwego rwo hasi,yananiwe guhagarika umunya Croatia witwa Mislav Orsic wabatsinze ibi bitego byose uko ari 3-0 byabonetse muri uyu mukino.Ibitego 2 bya mbere Mislav Orsic yabitsinze ku munota wa 62 na 82 hanyuma icya 3 agitsinda ku munota wa 106.
Gutsindwa mu buryo bugayitse gutya byatumye benshi bemeza ko umutoza Jose Mourinho ashobora kwirukanwa vuba cyangwa se abakinnyi barimo Harry Kane na Son bakazigendera mu mpeshyi.
Kuri uyu wa Gatanu i Nyon harabera Tombola ya 1/4 cya Europa League na Champions League aho muri iki cyiciro buri kipe yemerewe gutombora indi.
Amakipe yageze muri 1/4 cya Europa League:
Ajax (NED)
Arsenal (ENG)
Dinamo Zagreb (CRO)
Granada (ESP)
Manchester United (ENG)
Roma (ITA)
Slavia Praha (CZE)
Villarreal (ESP)
INGENGABIHE
1/4
Umukino ubanza: 8 Mata 2021
Uwo kwishyura: 15 Mata 2021
1/2
Umukino ubanza: 29 Mata
Uwo kwishyura: 6 Gicurasi
UMUKINO WA NYUMA
Kuwa Gatatu 26 Gicurasi 2021 (Gdańsk Arena, Poland)
