Kuri uyu wa Gatanu, perezida Uhuru Kenyatta wa Kenya yahagaritse ingendo ziva n'izijya mu ntara eshanu, zirimo n'umurwa mukuru wa Nairobi, kubera ubwiyongere bwa Covid-19.
Intara za Kajiado, Kiambu, Machakos, Nakuru na Nairobi zatangajwe nk'ahantu higanje cyane iyi virusi.
Kenyatta yavuze ko ubu abantu nibura barindwi bapfa buri munsi bishwe na Covid-19.
Inama zose n'ibikorwa byose bihuza abantu muri izo ntara birabujijwe, gusa abashyingura bemerewe kutarenga 50 naho ubukwe ntiburenze abantu 30.
Ingendo mpuzamahanga zirakomeza ariko abagenzi bakabanza kwerekana icyangombwa ko badafite Covid-19.
Abakozi ba leta n'abigenga nabo bategetswe gukorera mu ngo zabo kugeza hatanzwe amabwiriza mashya.
Perezida wa Kenya yavuze ko amasaha y'umukwabu wa nijoro yavanywe saa yine ashyirwa saa mbili z'ijoro kugeza saa kumi za mugitondo muri izo ntara.
Ubucuruzi bw'inzoga muri izo ntara bwahagaritswe na za restaurant zategetswe kujya zishyira amafunguro abantu aho bari.
Igipimo cy'ubwandu bwa Covid-19 muri Kenya cyavuye kuri 2 kigera kuri 22% hagati y'ukwezi kwa mbere n'uku kwezi kwa gatatu. Izi ngamba nshya , zizatangira gukurikizwa guhera ku wa Gatandatu saa sita z'ijoro.
Source : https://impanuro.rw/2021/03/26/amakuru-mashya-nairobi-nizindi-ntara-zashyizwe-mu-kato/
