Abaperezida b'ibihugu bya Africa bategerejwe i Dodoma gusezera bwa nyuma John Magufuli #rwanda #RwOT

Abaperezida 10 b'ibihugu bya Africa biteganyijwe ko kuri uyu wa Mbere tariki ya 22 Werurwe 2021, bagera i Dodoma mu murwa mukuru wa Tanzania ahabera umuhango wa leta wo gusezeraho bwa nyuma John Magufuli watabarutse ku myaka 61 azize uburwayi bw'umutima.

Perezida Félix Tshisekedi wa DR Congo na Emmerson Mnangagwa wa Zimbabwe bamaze kugera muri Tanzania gusezera bwa nyuma kuri Magufuli.

Ibiro bya perezida Cyril Ramaphosa wa Africa y'Epfo byatangaje ko nawe uyu munsi yageze i Dodoma muri uwo muhango, ubera ku rubuga rwa Jamhuri i Dodoma.

Abakuru b'ibihugu birimo Kenya, Zambia, Morocco, Namibia, Malawi na Botswana nabo bari mu bitezwe i Dodoma uyu munsi. Abandi bategerejwe barimo minisitiri w'intebe w'u Rwanda, visi perezida w'u Burundi, minisitiri w'ububanyi n'amahanga wa Angola n'intumwa z'imiryango y'ibihugu Tanzania ibamo nka SADC na EAC.

BBC dukesha iyi nkuru ivuga ko nyuma yo gusezerwaho i Dodoma umurambo wa Magufuli uzajyanwa gusezerwaho muri Zanzibar, na Mwanza mbere yo gusezerwaho bwa nyuma no gushyingurwa aho akomoka hitwa Chato mu majyaruguru ya Tanzania.

Perezida Magufuli yatabarutse mu cyumweru gishize ku wa gatatu tariki ya 17 Werurwe azize uburwayi bw'umutima, nk'uko byatangajwe na Samia Suluhu Hassan, wahise amusimbura.


Ahashyizwe umurambo wa Magufuli i Dodoma



Source : https://impanuro.rw/2021/03/22/abaperezida-bibihugu-bya-africa-bategerejwe-i-dodoma-gusezera-bwa-nyuma-john-magufuli/

Post a comment

0 Comments