Bamwe mu Bakuru b'Ibihugu ku mugabane wa Afurika cyane cyane ba Perezida, bakoresha telefone zitandukanye n'izikoreshwa na rubanda nyamwinshi mu buryo bwo kwirindira umutekano.
Urubuga Africa Report rwashyize ahagaragara zimwe muri telefone zikoreshwa n'aba Bakuru b'Ibihugu n'uburyo bazikoreshamo.
Uru rubuga ruvuga ko Abakuru b'Ibihugu byinshi byo muri Afurika y'Iburengerazuba, bakoresha telefone za 'Gatushe' zo mu bwoko bwa Teorem zikorwa n'ikigo cya Thales cyo mu Bufaransa.
Telefone ya Teorem iri mu za mbere zitinjirirwa
Bene izi telefone ni zo zakoreshejwe na ba Perezida b'u Bufaransa barimo Jacques Chirac, Nicolas Sarkozy na François Hollande.
Uruganda Thales rwagiye ruvugurura telefone ya Teorem mu buryo bw'ikoranabuhanga ryo kubika amabanga, rwongeramo iryitwa CryptoSmart Technology ryakozwe na Ercom.
Dore bamwe mu Bakuru b'Ibihugu muri Afurika na telefone bakoresha
Africa Report yatangaje ko ba Perezida bo kuri uyu mugabane kandi bakunze gukoresha telefone za Blackberry. Aba barimo Macky Sall uyoboye Senegal na Faure Gnassingbé wa Togo.
Blackberry na yo ikunzwe na ba Perezida kuri uyu mugabane
Perezida wa Guinea, Alpha Condé we ngo akoresha telefone ziri hagati y'eshatu n'enye, akaba akoresha uburyo bw'itumanaho bwa 'Telegram', yagiyeho avuye kuri WhatsApp no gukoresha ubutumwa bwanditse gusa.
Perezida wa Côte d'Ivoire, Alassane Ouatara akoresha modeli (model) ya kera telefone ya Nokia, gusa ngo hari indi aba afite ku ruhande rwe.
Perezida Ouattara akoresha Nokia ya kera
Hari abandi ba Perezida basa n'abadakoresha telefone. Abo barimo Paul Biya wa Cameroon, Denis Sassou-Nguesso wa Repubulika ya Congo na Ismaïl Omar Guelleh wa Djibouti.
Gukoresha telefone idasanzwe, irenze imwe cyangwa se kudakoresha n'imwe; kimwe no gukoresha uburyo bw'itumahano butandukanye (ubutumwa bwanditse cyangwa telegram) bikorwa mu buryo bwo kwirinda ko hari uwo ku ruhande ushobora kumenya ibyaranze ikiganiro hagati y'aba Bakuru b'Ibihugu n'abo baganira.
