Uyu mukwabo wabaye ku wa 7 Ukuboza 2020, hagamijwe gukomeza kugenzura iyubahirizwa ry'amabwiriza yashyizweho n'inzego zibishinzwe mu rwego rwo gukomeza gukumira ikwirakwira rya COVID-19.
Amabwiriza y'Umujyi wa Kigali agenga uburyo bwo guhana abatubahirije ingamba zo kwirinda ikwirakwizwa ry'icyorezo cya COVID-19 mu mujyi wa Kigali, ateganya ko gufungura akabari bitemewe.
Ufashwe yafunguye akabari, aha kaba utubari utwo aritwo twose twaba udusanzwe, utwo muri hoteli, muri resitora, muri butike, muri supamaketi, mu ngo n'ahandi hose hahinduwe akabari nyiri ubucuruzi cyangwa nyiri urugo azishyura amafaranga y'u Rwanda ibihumbi 150.
Ibindi bihano biteganywa n'aya mabwiriza harimo gufungirwa ibikorwa yari asanzwe yemerewe byibura mu gihe cy'ukwezi kumwe ariko kitarenze amezi atatu, akazafungurirwa ari uko amaze kwerekana ingamba yafashe zo kwirinda icyorezo cya COVID-19.
Hari indi ngingo ivuga ko abantu bazajya bafatwa batahanye intera bari muri butike, amaduka, ahacururizwa ibikoresho by'ubwubatsi, igaraje n'ahandi, nyiri ubucuruzi cyangwa nyiri igikorwa azishyura amafaranga y'u Rwanda ibihumbi 50.
Umuvugizi wa Polisi mu Mujyi wa Kigali, CIP Sylvestre Twajamahoro yabwiye TV10 dukesha iyi nkuru ko abo bacuruzi bafashwe barenze kuri ayo mabwiriza bose bakorera mu Murenge wa Kimisagara ahakunzwe kwitwa ku Mashyirahamwe.
Yavuze ko ubwo hakorwaga igikorwa cyo kugenzura iyubahirizwa ry'amabwiriza yo kurwanya COVID-19 basanze hari utubari 4 dufunguye ducuruza inzoga ba nyiratwo bitwaje ko bafitemo na resitora.
Usibye abo kandi hari n'abandi bacuruzi bafite resitora baciwe amande bitewe n'uko abakiriya babo bari bicaye begeranye nyamara amabwiriza avuga ko abantu bari muri resitora n'ahandi hose bagomba kwicara bahanye intera.
Umuvugizi wa Polisi mu Mujyi wa Kigali yongeye kwibutsa abantu bafite ubucuruzi bwa resitora kutitiranya ibintu cyangwa ngo barenge ku mabwiriza nkana kuko bikururira ibihano bitari ngombwa, kandi bakaba ba nyirabayazana bo gukwirakwiza icyorezo cya COVID-19.
