Impuzamashyirahamwe y'umupira w'amaguru muri Afurika 'CAF', yaciye Gambia amande y'ibihumbi 100 by'amadorali(akabakaba miliyoni 100 z'amafaranga y'u Rwanda) kubera kuraza ikipe y'igihugu ya Gabon hasi kuri sima ku kibuga cy'indege.
Tariki ya 16 Ugushyingo 2020 nibwo Gambia yakinnye na Gabon mu gushaka itike y'igikombe cy'Afurika cya 2022, mbere y'uyu mukino ubwo ikipe y'igihugu ya Gabon yari igeze ku kibuga cy'indege yarahatinze ndetse iraharara, abakinnyi barara hasi kuri sima.
Hahise hakwirakwira amafoto atandukanye ku mbuga nkoranyambaga aba bakinnyi baryamye ku kibuga cy'indege, aho byageze saa kumi za mu gitondo bakiri ku kibuga cy'indege.
Kapiteni w'iyi kipe abinyujije ku mbuga nkoranyambaga ze, Pierre-Emerick Aubameyang, yagaragaje ko atishimiye ibyamubayeho hamwe na bagenzi be.
Yagize ati 'Ibi ntabwo biduca intege ariko abantu bakeneye kubimenya by'umwihariko CAF ikabyirengera. Mu 2020, turashaka ko Afurika ikura kandi ntabwo ari muri ubu buryo tuzabigeraho.'
Ku wa Kabiri w'iki cyumweru CAF nibwo yasohoye ibihano byafatiwe amakipe atandukanye, maze akanama gashinzwe imyitwarire ka CAF gahanisha ishyirahamwe ry'umupira w'amaguru muri Gambia kwishyura ibihumbi 100 by'amadorali kuko ritubahirije amahame agenga siporo ubwo abakinnyi ba Gabon barazwaga hasi ku kibuga cy'indege cy'i Banjul mbere y'umukino wahuje ibihugu byombi mu kwezi gushize.
Ibihumbi 50$ muri ayo mande, ntazishyurwa mu gihe federasiyo ya Gambia itazaba yongeye kugaragarwaho n'amakosa nk'ayo mu gihe cy'amezi 24.
Kuri Aubameyang na we ntabwo CAF yishimiye ibyo yatangaje na we ahanishwa kwishyura ibihumbi 10 by'amadorali.
