Kugirango usobanukirwe neza, turifashisha ubusesenguzi bw'umunyamakuru wa BBC muri Amerika ya ruguru witwa Anthony Zurcher. Turakugaragariza uko byifashe muri Leta enye zisigaye kugirango hemezwe uwatsinze amatora uwo ari we.
Leta ya GEORGIA, ifite intumwa 16 zitora. Uko bihagaze ubu muri iyi Leta, Trump ari imbere ariko Biden ari kugabanya ikinyuranyo kuko ubu kiri munsi y'amajwi 2,000. Abategetsi baho bavuga ko hasigaye kubarwa amajwi agera ku 15,000. Ayo ni amajwi yoherejwe n'iposita cyane cyane yo mu mujyi wa Atlanta na Savannah yiganjemo abatoye cyane Biden, gusa ukurikijwe amajwi atarabarurwa byose birashoboka.
Leta ya PENNSYLVANIA ifite intumwa 20 zitora. Uko bihagaze kugeza ubu Trump ari imbere ariko Biden ari kugabanya ikinyuranyo, mbere cyari ikinyuranyo cy'amajwi arenga 500,000 ariko ubu kigeze ku 26,000. Uhagarariye iyi leta avuga ko kugeza ejo kuwa kane mu gitondo hari hakiri amajwi 550,000 ahatandukanye, hafi 1/2 cyayo ubu ntarabarwa. Ayo majwi ari mu duce twiganjemo Abademokarate aho Hillary Clinton yatsinze cyane mu 2016. Aha naho bigaragara ko amajwi atarabarurwa ari menshi kuburyo ntawahita yemeza uko biza kurangira. N'ubwo Trump ari imbere, aha amajwi menshi asigaye ni ay'iposita yo mu gace ka Philadelphia, ariyo mpamvu Biden ari kubona menshi agasatira Trump.
Muri Leta ya ARIZONA ho hari Intumwa 11 zitora. Uko bihagaze ubu Joe Biden aracyarusha Trump amajwi 46,000 ariko Trump amajwi ye yakomeje kwiyongera ejo kuwa kane. Abategetsi muri iyi leta kuwa kane nimugoroba bavuze ko hakiri amajwi 470,000 atarabarwa ubu ntibizwi neza asigaye uko angana. Ayo majwi ni ay'ahatandukanye muri iyi leta, ariko cyane cyane mu duce twegereye umujyi mukuru wa Phoenix.
Muri Leta ya NEVADA hari Intumwa 6 zitora. Uko bihagaze kugeza ubu Joe Biden ari imbere hafi amajwi 12,000, ikinyuranyo yashyizemo kuwa kane mu gitondo ubwo bari bamaze gutangaza amajwi mashya yabaruwe. Abategetsi baravuga ko hari amajwi agera ku 190,000 asigaye atarabarurwa. Hafi 90% muri yo ni ayo mu ntara ya Clark County ahaba umujyi wa Las Vegas, kandi menshi muri ayo majwi ni ayoherejwe ku iposita.
Ikinyuranyo gito Biden yashyizemo gishobora kwiyongera mu gihe amajwi y'iposita yifashishijwe cyane n'Abademokarate akomeje kubarwa - kereka mu gihe abantu batoye bwa mbere baba bashyigikiye Trump. Utundi duce tw'icyaro tw'abatsimbaraye ku bya cyera b'Abarepubulikani natwo turohereza amajwi yatwo ariko ntabwo dutuwe cyane.
