Leta y' u Bufaransa ifite umugambi wo gufunga cyangwa guca izahabu abaganga batanga impapuro zizwi ' nk'icyemezo cy'ubusugi' (Certificat de virginite) ku bashaka gushinga urugo (gushakana) banyuze mu madini.
Ni kimwe mu biri mu mushinga w'itegeko rigamije gukomeza umuco ndangabwiza w'u Bufaransa ndetse no kurwanya icyo Perezida Emmanuel Macron yita 'ukwikumira gushingiye kw'idini rya Isilamu'.
Ariko ishyirahamwe ryo mu Bufaransa ANCIC ritanga inama mu bijanye no gukuramo inda rivuga ko guhagarika 'ibipimo by'ubusugi' bisaba igikorwa gikomeye cyo gukora ubukangurambaga ku bantu.
Umuryango w'abibumbye, ONU, uvuga ko ibi bipimo bigomba guhagarikwa.
Umwe mu bayobozi bakomeye mu Bufaransa avuga ko umushinga w'iri tegeko (usanzwe utaraganirwaho n'abanyapolitike b'u Bufaransa) usaba ko umuganga uwo ari we wese waramuka atanze urupapuro rw' 'icyemezo cy'ubusugi' yafungwa umwaka wose, agatanga n'ihazabu y'ama euro 15.000.
Nk'uko bitangazwa na France 3 TV news, ngo hafi 30% by'abaganga bo muri iki gihugu bavuga ko basabwe izi mpapuro kandi ko benshi muri bo babyanze.
Ishami rya ONU rishinzwe Ubuzima kw'isi OMS/WHO rivuga ko ubu buryo bwo gupima Ubusugi hakoreshejwe amaso cyangwa intoki budashobora kwemeza neza niba umugore cyangwa umukobwa amaze gukora cyangwa atarakora imibonano mpuzabitsina.
OMS ivuga kandi ko iri ari guhutaza uburenganzira bw'Umugore cyangwa Umukobwa.
Ubufaransa bugiye gushyiraho ibihano ku baganga bapima ubusugi
