Amerika igiye gushyira mu bikorwa igihano cy'urupfu ku mugore ufungiye muri gereza yo ku rwego rwa leta, bwa mbere kigiye guhabwa umugore mu myaka igera kuri 67 ishize, nkuko byavuzwe n'ibiro by'ubutabera by'iki gihugu.
Mu kwezi kwa cumi na kabiri mu mwaka wa 2004, umugore witwa Montgomery yatwaye imodoka ava muri leta ya Kansas ajya mu rugo rwa Bobbie Jo Stinnett, muri leta ya Missouri, bivugwa ko agiye kugura ikibwana cy'imbwa, nkuko itangazo ry'ibiro by'ubutabera by'Amerika ribivuga.
Iryo tangazo rigira riti:
'Amaze kugera imbere mu rugo, Montgomery yibasiye Stinnett â€" wari utwite inda y'amezi umunani â€" aramuniga kugeza ataye ubwenge'.
Rikomeza riti:
'Akoresheje icyuma cyo mu gikoni, Montgomery yahise agitera mu nda ya Stinnett, bituma atongera kugarura ubwenge'.
'Hakurikiyeho kugundagurana, nuko Montgomery aniga Stinnett kugeza apfuye. Montgomery yahise akura umwana mu mubiri wa Stinnett, uwo mwana aramutwara, ndetse agerageza kujijisha ko ari uwe bwite'.
Mu mwaka wa 2007, inteko y'abacamanza yasanze ko Montgomery ahamwa n'icyaha cyo gushimuta cyo ku rwego rwa leta cyavuyemo urupfu.
Nuko iyo nteko â€" nta n'umwe uvuyemo â€" imukatira igihano cy'urupfu.
Biteganyijwe ko Montgomery, w'imyaka 52, aterwa urushinge rw'ingusho ku itariki ya 8 Ukuboza 2020.
Ariko abanyamategeko ba Montgomery bavuga ko akiri umwana yagize kwangirika k'ubwonko kubera gukubitwa, ndetse ko atameze neza mu mutwe, ko rero adakwiye guhabwa igihano cy'urupfu.
