Ikigo cy'ubushakashatsi mu by'ubuvuzi, mu gihugu cy'u Bufaransa, cyatangaje ko cyavumbuye akaremangingo kavura Covid-19. Abashakashatsi bafite icyizere cyo kuba bakoze umuti bitarenze 'intangiriro y'umwaka wa 2021'.
Kuva mu kwezi kwa Werurwe uyu mwaka, Ikigo cy'ubushakashatsi mu by'ubuvuzi cyo mu mujyi wa Lille mu gihugu cy'u Bufaransa- l'Institut Pasteur de Lille (IPL)- cyasuzumanye ubushishozi imiti irenga 2000 hakoreshejwe uburyo bwa Apteeus bwizewe mu gusuzuma imiti.
Umuti umwe muri yo, usanzwe ukoreshwa mu ikorwa ry'imiti myinshi, wagaragaje ubushobozi mu guhangara Covid-19.
Mu bisobanuro bya Professeri Benoît Déprez, umuyobozi w'ubushakashatsi mu kigo cya IPL, mu kiganiro yagiranye n'igitangazamakuru La Voix du Nord, agira ati:
'Twagaragaje ko imikorere yawo ishobora kwica virusi ya Covid-19 iyo ukoreshejwe ku gipimo gikubye inshuro 30 igisanzwe giteganyijwe'.
Amageregezwa ya mbere yakorewe ku turemangingo tw'umuntu two mu bihaha 'yagaragaje icyizere kinini cyane', nk'uko bitangazwa na Profeseri Déprez.
Cyane cyane ko ngo habayeho ingaruka nke cyangwa se nta n'ingaruka na busa zagaragaye nyuma y'ikoreshwa ry'uriya muti.
Nk'uko uyu mushakashatsi akomeza abivuga, 'Iyo ukoreshejwe, ibimenyetso bya mbere by'uburwayi bikigaragara, uyu muti ugabanya cyane umubare wa za virusi mu maraso y'umurwayi, ndetse ntashobore no kwanduza abandi. Naho iyo ufashwe nyuma, uhagarika ubukana bw'uburwayi. Imikorere yawo ni iy'umuti ushinzwe kurwanya virusi ubwayo, ntabwo ari iy'urwanya ingaruka zayo'.
Ikintu cyaba gisigaye ni intambwe y'igeragezwa nyirizina, aho ikigo IPL gikeneye gukusanya amafaranga agera kuri miliyoni 5 z'amayero.
Mu kiganiro na Ubwo yabazwaga na kiriya gitangazamakuru La Voix du Nord, uyu mushakashatsi yijeje abantu agira ati
'Tugiye gukora amageragezwa y'uy'umuti ku bantu mu buryo bugendera cyane ku mategeko, hubahirizwa intambwe zose ziteganyijwe mu bushakashatsi'.
Kiriya kigo cy'ubushakashatsi kigaragaza icyizere ko
'Igishimishije ari uko dushobora kwihuta muri uru rugendo, kubera ko iyo miti yarangije kubona uburenganzira bwo kujyanwa ku isoko'.
Nk'uko Profeseri Déprez abisobanura, aca amarenga ku buryo byagenze abantu birukankira umuti wa chloroquine.
Agira ati:'Iyo dufite mu bubiko ni mike kandi dukeneye myinshi ihagije kugira ngo dushobora gukora amageragezwa yose. Ntitwifuza kandi ko abantu bagwirirana bawushaka'.
Kugeza magingo aya, izina ry'uyu muti riracyari ibanga rikomeye.
Source : https://impanuro.rw/2020/09/27/breaking-news-umuti-wa-covid_19-urakozwaho-imitwe-yintoki/
