Perezida w'u Rwanda, Paul Kagame yashimiye ikipe ya Arsenal nyuma yo kwegukana Community Shield Cup 2020 itsinze Liverpool.
Community Shield Cup ni igikombe kibanziriza umwaka w'imikino wa shampiyona y'u Bwongereza, gihatanirwa n'ikipe iba yaregukanye igikombe cya shampiyona ndetse n'ikipe yegukanye FA Cup.
Liverpool yegukanye shampiyona na Arsenal yegukanye FA Cup, ku munsi w'ejo ku wa Gatandatu zahuriye ku mukino wo guhatanira igikombe cya Community Shield.
Iki gikombe cyaje kwegukanwa na Arsenal itsinze Liverpool kuri penaliti 5-4, ni nyuma y'uko amakipe yombi yari yanganyije 1-1.
Perezida Kagame usanzwe uri umufana wa Arsenal ukomeye, abinyujije ku rukuta rwe rwa Twitter yashimiye cyane Arsenal kuba yegukanye iki gikombe.
Yagize ati“ndishimye ku bwa Arsenal. Community Shield(igikombe begukanye). Kwiyubaka buhoro ariko ushikamye biganisha ku ntsinzi. Mwakaze cyane.”
Kwegukana Community Shield Cup 2020 kwa Arsenal, byatumye ihita igira ibikombe 16 bya Community Shield.
source http://isimbi.rw/siporo/article/perezida-kagame-yashimiye-arsenal-4371
