Africa Haguruka' igiye kuba ku nshuro ya 21 hifashishijwe ikoranabuhanga #rwanda #RwOT

Igiterane cy'ububyutse cyiswe ‘Africa Haguruka' gihuriza hamwe abantu b'ingeri zose mu ivugabutumwa kuri iyi nshuro cyateguwe mu buryo bwihariye bitewe n'ingamba zashyizweho mu kwirinda ikwirakwira rya Coronavirus.

Africa Haguruka igiye kuba ku nshuro ya 21 iteganyijwe ku wa 9-16 Kanama 2020; izakorwa hifashishijwe ikoranabuhanga. Africa Haguruka yateguwe na Authentic Word Ministries ku bufatanye na Zion Temple Celebration Center, isanzwe ifite intero igira iti “Africa Haguruka urabagirane”. Insanganyamatsiko y'uyu mwaka ni “Africa yoborwa n'Imana”, iboneka mu Gitabo cya Yesaya 48:17.

Africa Haguruka yashibutse mu iyerekwa Dr Paul Gitwaza uyobora Itorero Zion Temple Celebration Center yagize mu 2000, rigamije kuzamura iterambere ry'Umugabane wa Afurika no guhembura abawutuye binyuze mu ijambo ry'Imana.

Dr Paul Gitwaza watangije iki gikorwa cya Africa Haguruka Urabagirane yavuze ko muri iki gihe igikwiye guhabwa agaciro ari ubuzima n'umutekano by'abantu.

Yagize ati “Niyo mpamvu twahisemo ko kuri iyi nshuro Africa Haguruka yaba hifashishijwe ikoranabuhanga abantu ntibahure bisanzwe. Ariko nanone ntabwo Coronavirus igomba gutuma tuguma mu bwoba igatuma duhagarika ibikorwa byose tukibagirwa gukomeza gusingira ibyo Imana yaturemeye.''

“Tuzakoresha uburyo bwose buhari yaba uburyo busanzwe ubw'ikoranabuhanga nka murandasi, radio na televiziyo dukomeze gahunda yacu yo gukurikira indangagaciro z'Imana tugahindura Afurika. Ubukana bwose iki cyorezo cyaba gifite, ubwoba ntabwo aribwo bufite ijambo rya nyuma ku buzima bwacu, ni Imana yonyine. Turasabwa ikintu kimwe gusa: kwemera kuyoborwa n'Imana (Yesaya 48:17).''
Iki giterane cyatumiwemo abantu batandukanye barimo abo mu Rwanda n'abaturutse ku migabane itandukanye nka Rev. Dr. Philip Igbinijesu, Umuyobozi wa Word Assembly, Itorero ryo muri Nigeria rifite amashami atandukanye ku Isi; Dr.

Shandon Hart, Umushakashatsi mu Kigo Corning Incorporated gikora ibijyanye n'ikoranabuhanga cyo muri Leta Zunze Ubumwe za Amerika; Dr. Ben Leong, Umwarimu muri Kaminuza Nkuru y'Igihugu ya Singapore (NUS), akaba n'Umuyobozi Mukuru w'ibijyanye n'Ubushakashatsi n'Ikorabuhanga muri Minisiteri y'Uburezi muri Singapore; Dumi Lopang, Umukirisitu w'Impuguke mu by'Itangazamakuru muri Botswana akaba anafite ibigo by'itangazamakuru ; Apostle Victor Mokgotlhoa uyobora Itorero Praise Tabernacle rifite icyicaro gikuru i Johannesburg muri Afurika y'Epfo; Pastor Zerubbabel Mengistu uyobora Beza International yo muti Ethiopia; Rev. Mohamed Sanogo uyobora Itorero Vases d'Honneur ryo muri Côte d'Ivoire; Apostle Alain Caron uyobora Itorero Le Chemin Apostolic Centre ryo muri Canada n'abandi.

Authentic Word Ministries iri muri gahunda yo kwimuka iva mu buryo bwa gakondo ijya mu ikoranabuhanga mu rwego rwo guha abantu bose ku Isi amahirwe yo gukurikira iki giterane kidasanzwe.

Gitwaza asanga “Guhindura Africa atari inshingano z'abanyapolitiki, abacuruzi n'abarezi gusa ahubwo ari n'inshingano z'itorero guteza imbere uyu mugabane.”

Africa Haguruka izatangirwamo ibiganiro byibanda ku iterambere rya Afurika bizajya bitangira saa Kumi n'imwe (5:00 pm) kugera saa Moya (7:00 pm), naho igiterane cy'ububyutse kibe kuva 7:30pm kugera 9:30 pm. Kizajya kinyura kuri radio na TV bitandukanye by'umwihariko Radio na TV Authentic no kuri Youtube.

Iki giterane cyubakiye ku ngingo zirindwi z'ingenzi z'ubuzima zirimo Ubuyobozi, Umurimo w'Imana, Ubucuruzi, Umuryango, Uburezi, Itangazamakuru n'Imyidagaduro ari nazo abayitabiriye bahuguriwemo n'impuguke zitandukanye.

Uretse gahunda ya Africa Haguruka urabagirane, Authentic Word Ministries ifite n'ibindi bikorwa by'iterambere nk'ivuriro “Bethsaida”, ishuri “Authentic International Academy” na radio na Televiziyo Authentic.

Daniel@Agakiza.org

Source:Igihe



source https://agakiza.org/Africa-Haguruka-igiye-kuba-ku-nshuro-ya-21-hifashishijwe-ikoranabuhanga.html

Post a comment

0 Comments