Umutoza mukuru w'ikipe ya APR FC, Adil Mohammed yashimiye ubuyobozi bw'ikipe ya APR FC ku bw'icyizere bamugiriye bakamwongerera amasezerano y'imyaka ibiri atoza iyi kipe.
Mu mpeshyi ya 2019 ni bwo APR FC yasinyishije umutoza w'umunya-Maroc, Adil Erradi amasezerano y'umwaka umwe.
Uyu mutoza yagize umwaka mwiza aho yegukanye igikombe cya shampiyona adatsinzwe umukino n'umwe, ibi nibyo byatumye ikipe y'ingabo z'igihugu imwongerera amasezerano y'imyaka 2.
Adil aganira n'urubuga rw'iyi kipe, yashimiye ubuyobozi bwa APR FC bwamugiriye icyizere bakamwongerera amasezerano kimwe n'abatoza bafatanyije.
Yagize ati“ Nashimishijwe cyane no kongera amasezerano y'imyaka ibiri mu muryango mwiza wa ARR FC hamwe n'abakozi ba tekinike (Pablo, Mugabo, Haj Taeib), ndashimira cyane abayobozi ku bw'icyizere bangiriye, ndashimira n'abakinnyi ubwitange bwabo bagaragaje mu mwaka w'imikino wa 2019-2020. Sinasoza ntashimiye abafana batubaye hafi kandi tuzakora ibishoboka byose kugira ngo tugere ku ntego zacu mu mwaka utaha wa 2020-2021.”
Mu mwaka we wa mbere, Adil yegukanye igikombe cya gisirikare 2019 gihuza amakipe y'ingabo z'ibihugu bigize umuryango wa Afurika y'Iburasirazuba, igikombe cy' Intwari 2020 ndetse na Shampiyona ya 2019-20 adatsinzwe umukino n'umwe.
Uyu mutoza yavuze ko icyizere yagiriwe na we atazatenguha iyi kipe, we na bo bakorana bagiye gukora cyane kugira ngo bagere ku ntego bihaye mu mwaka w'imikino wa 2020-2021.
source http://isimbi.rw/siporo/article/adil-mohammed-yashimiye-ubuyobozi-bw-ikipe-ya-apr-fc
