Umutoza wungirije w'ikipe ya APR FC, Dr Nabyl Bekraoui yamaze gutandukana n'iyi kipe nyuma y'umwaka umwe ayitoza.
Mu minsi itambutse ni bwo hakwirakwiye inkuru y'uko uyu mutoza wari usoje amasezerano ye yaba yongereye undi mwaka nk'umwungiriza wa Adil muri APR FC.
Mu ijoro ryakeye ni bwo ISIMBI yamenye amakuru y'uko uyu mutoza yatandukanye na APR FC, ni nyuma y'uko atazongererwa amasezerano.
Ubwo ISIMBI yageragezaga kuvugana n'uyu mutoza ntibyakunze kuko atabonetse kuri telefoni, gusa umwe mu bantu ba hafi b'iyi kipe yemereye ISIMBI ko uyu mutoza atigeze yongera amasezerano ndetse ko atazanongera amasezerano muri iyi kipe akaba ategereje ko ibibuga by'indege bifungurwa akagenda.
Amakuru akaba avuga ko impamvu atazongera amasezerano ari uko umutoza mukuru atishimiye gukomezanya na we.
Mbere gato y'uko shampiyona ihagarikwa kubera icyorezo cya COVID-19 byavuzwe ko uyu mutoza yagiranye ibibazo n'umutoza mukuru Adil Erradi ndetse byanavugwaga ko na shampiyona atari kuyisoza iyo ikomeza.
source http://isimbi.rw/siporo/article/umutoza-wungirije-wa-apr-fc-yatandukanye-n-iyi-kipe
