Nyuma y'uko myugariro Iragire Saidi atandukanye na Rayon Sports, Nkomezi Alex na we agatandukana na APR FC, amakuru avuga ko aba basore bombi bamaze kwerekeza muri Mukura VS bahoze bakinira.
Ku munsi wo ku wa Gatatu ni bwo APR FC yarekuye Nkomezi Alex wari usigaranye amasezerano y'umwaka umwe muri iyi kipe. Nyuma yo kudahirwa n'umwaka we wa mbere akaba yarasabye ko batandukana, iyi kipe yagezemo muri 2019 na yo irabimwemerera.
Ejo hashize ku wa Kane kandi ni bwo amakuru yamenyekanye ko Iragire Saidi wageze muri Rayon Sports umwaka ushize wa 2019, nyuma yo kudahabwa ibyo yemerewe na we yatandukanye n'iyi kipe ku bwumvikane.
Amakuru avuga ko aba basore uko ari 2 bamaze gusubira mu ikipe ya Mukura VS bakiniraga mbere yo kuza mu mujyi wa Kigali.
Si abo gusa kuko na myugariro wo ku ruhande rw'iburyo wakiniraga AS Kigali, Nshimiyimana Marc Govin, amakuru ISIMBI yamenye ihawe n'umwe mu nshuti z'uyu musore nawe yamaze kwerekeza mu ikipe ya Mukura VS y'i Huye.
source http://isimbi.rw/siporo/article/nyuma-yo-gutandukana-na-apr-fc-na-rayon-sports-berekeje-muri-mukura-vs