Kizigenza Casemiro yatangaje ko amakipe afite gahunda y'igihe kirekire nka Arsenal, Liverpool na Manchester City ari ikibazo kuri Manchester United ndetse igomba kuyatsinda niba ishaka gutwara igikombe.
Amashitani atukura ntabwo arongera gutwara igikombe cya shampiyona kuva 2013 kandi agomba gutsinda benshi mubo bahanganye niba ashaka kongera kugaruka ku mwanya wa 1.
Umutoza Erik ten Hag aratanga icyizere ko ikipe ya Man United ishobora kongera kugaruka mu bihe byiza ndetse igatwara igikombe cya shampiyona gusa Casemiro yavuze ko bizasaba ko bigaranzura bariya bakeba batatu.
Muri iki gihe United iri ku mwanya wa gatatu, inyuma y'abakeba babiri bakomeye aribo City na Arsenal, ariko iri imbere ya Liverpool,iri mu bihe bibi.
Kuva muri 2018, Reds na City basangiye ibikombe bya shampiyona hagati yabo mu gihe Gunners isa naho ishobora kwica ibirori.
Casemiro yagize ati "Iyo ugeze mu ikipe nshya,uba ufite inzozi zo gukora amateka...cyane cyane iyo ubona ibigwi by'ikipe.Tuzi amateka.Ariko nanjye ndabizi ko nkeneye igihe cyo kumenyera abakeba bagize imishinga y'igihe kirekire mbere yacu nka Arsenal, Manchester City na Liverpool.
Bose bafite abatoza bamaze igihe kandi banafite amahirwe.Nishimiye uko nisanze hano,abo dukinana n'abatoza bari kumfasha,,,n'ururimi rw'Icyongereza,biragoye ariko ndi kugerageza kuba mwiza."
Casemiro yavuze ko kuva yagera muri Man United,buri wese mu ikipe yamuhaye ikaze kandi amwitaho.Uyu yemeje ko amerewe neza muri United nk'umwana w'imyaka 15.
Casemiro yagaragaje akamaro ke kuva yabona umwanya wo gukina ndetse inshuro yasibye,United yatsinzwe na Arsenal ibitego 3-2 mu mukino wa shampiyona uheruka.
