Header Ads Widget

Technology

Tigray: Ingabo za leta 'zinjiye' mu mujyi w'ingenzi wa Shire #rwanda #RwOT

Shire ni umwe mu mijyi minini mu ntara ya Tigray kandi uri hafi y'umurwa mukuru wayo, Mekele.

Kuwa mbere leta ya Addis Ababa yari yatangaje ko igamije kwigarurira ibibuga by'indege byose byo muri Tigray, Shire ni umwe mu mijyi ifite ikibuga cy'indege.

Mu itangazo, abarwanyi b'intara ya Tigray bavuze ko 'mu ntambara kuva mu gace runaka ni ibisanzwe', kandi bise gufata umujyi wa Shire 'iby'igihe gito'.

Shire iri mu ntera ya kilometero zirenga gato 100 uvuye ku murwa mukuru Mekele, iri kandi hafi y'umupaka wa Eritrea mu majyeruguru. Ufatwa nk'umujyi w'ingenzi mbere yo kugera i Mekele.

Imirwano muri Tigray yongeye kubura muri Kanama(8) nyuma y'amezi atanu y'agahenge.

Ubu hari ubwoba bw'akaga gakomeye ku baturage kuko ubwikorezi bw'imfashanyo ijyayo bwahagaze kubera imirwano.

Abantu ibihumbi amagana bahunze ingo zabo batinya urugomo, abarwanyi ba Tigray bahamagarira umuryango mpuzamahanga 'kuzuza inshingano zawo ugahagarika imirwano.'

Umunyamabanga mukuru wa ONU Antonio Guterres kuwa mbere yavuze ko muri Tigray ibintu 'birimo kurenga igaruriro', asaba ko imirwano ihagarara ako kanya.

Ariko urugomo n'imirwano birakomeje kandi amakuru ataremezwa neza avuga ko ingabo za leta, zifatanyije n'iza Eritrea, zirimo kwigarurira n'utundi duce mu majyepfo ya Tigray.



Source : https://umuryango.rw/amakuru/mu-mahanga/umutekano/article/tigray-ingabo-za-leta-zinjiye-mu-mujyi-w-ingenzi-wa-shire

Post a Comment

0 Comments

Nature