Ni umwanzuro w'inama y'abaminisitiri yateranye kuri uyu wa Gatandatu tariki ya 9 Mata 2022.
Iyo myanzuro ivuga ko abagenzi bose binjira mu Gihugu bakoresheje Ikibuga cy'indege Mpuzamahanga cya Kigali bagomba kuba bafite icyemezo cy'uko bipimishije Covid-19 (Rapid test), mu gihe cy'amasaha 72 mbere y'uko bahaguruka.
Ikomeza iti "Abo bagenzi bongera gupimwa bakigera ku kibuga cy'indege (PCR test), biyishyuriye."
Ni mu gihe abagenzi bose bava mu Gihugu bakoresheje Ikibuga cy'indege Mpuzamahanga cya Kigali bagomba kuba bafite icyemezo cy'uko bipimishije Covid-19, cyaba Rapid Test cyangwa PCR hakurikijwe igipimo gisabwa n'igihugu bagiyemo.
Icyo gipimo kigomba kuba kitarengeje amasaha 72 mbere y'uko bahaguruka.
Imyazuro ya Guverinoma ikomeza iti "Abanyarwanda bose bava mu Gihugu bagomba kuba barakingiwe Covid- 19."
Aya mabwiriza asimbura ayari asanzwe, avuga ko abantu bose binjira mu Rwanda bavuye mu mahanga bagomba kuba bafite icyemezo cyerekana ko batanduye COVID-19.
Ibipimo byari byemewe ni SARS-CoV 2 Real-Time Polymerase Chain Reaction (RT-PCR) byapimwe mu masaha 120 mbere yuko ahaguruka.
Abagenzi bose binjiye bagombaga kumara amasaha 24 muri hoteli yateganyijwe bategereje igisubizo cy'ikizamini gikurikira icyo bapimwe, mbere yuko baza mu Rwanda.
Muri hotel bapimaga umuntu COVID-19 ku $60, harimo $10 ya serivisi y'ubuvuzi.
Abantu basohotse mu gihugu nabo basabwaga kuba barapimwe COVID-19 hakoreshejwe PCR, mu masaha 120 mbere yuko ahaguruka.
Abagenzi baturutse mu bihugu by'abaturanyi bateganya gufatira indege mu Rwanda, bapimwaga ibimenyetso bakigera ku mupaka hanyuma bakerekeza kuri hoteli yateganyijwe aho bapimwa COVID-19.
