Header Ads Widget

Technology

#AFCON2021: CAF yemeje ko amakipe arimo Covid-19 yakina niba asigaranye abakinnyi 11 bazima #Rwanda #RwOT via @kigalitoday #rwanda #RwOT

Amabwiriza mashya ya CAF, avuga ko imikino izaba nta gisibya, n'ubwo muri abo bakinnyi 11 nta n'umwe muri bo waba asanzwe akina nk'umunyezamu. Igihugu icyo ari cyo cyose kizananirwa kwitabira umukino ngo kizajya giterwa mpaga y'ibitego 2-0.

Aya mabwiriza asohotse nyuma yuko ibihugu byinshi bitangaje ko mu makipe yabyo habonetsemo abanduye Covid-19, mbere yuko iryo rushanwa ritangira kuri iki cyumweru.

CAF yavuze ko "mu bihe byihariye" akanama gategura irushanwa "kazafata icyemezo gikwiye".

Ku wa Gatanu w'icyumweru gishize, ikipe y'igihugu ya Misiri yari yabaye ihagaritse guhaguruka yerekeza muri iryo rushanwa ribera muri Cameroon, ndetse biba ngombwa ko ihagarika imyitozo, nyuma yuko muri iyo kipe hagaragayemo abanduye Covid-19.

Iyo kipe ya Misiri, ikaba ifite umuhigo wo kuba ari yo imaze kwegukana iri rushanwa inshuro nyinshi, ni ukuvuga zirindwi, icyakora kuri uyu wa gatandatu yaje kwerekeza muri Cameroon.

Rutahizamu wa Arsenal, Pierre-Emerick Aubameyang, ni umwe mu bakinnyi babiri basanzemo Covid-19 ku wa kane mu ikipe y'igihugu ya Gabon. Na ho mu ikipe y'igihugu ya Senegal, kapiteni wayo Kalidou Koulibary, ni umwe mu bakinnyi bane ba Senegal basanzemo Covid-19.

Ni mugihe byabaye ngombwa ko ikipe y'igihugu ya Guinea na yo isiga mu Rwanda, aho yari yabanje kwitoreza, abakinnyi barimo myugariro wayo Mikael Dyrestam, umukinnyi wo hagati Morlaye Sylla na rutahizamu Seydouba Soumah.

Amakipe ya Cap-Vert (Cape Verde) hamwe na Gambia, iyi yitabiriye iri rushanwa ku nshuro ya mbere, mu cyumweru gishize yibasiwe n'ubwandu bwinshi, mu gihe Tunisia na yo yatangaje ko hari abakinnyi bayo banduye aho yari yabanje kwitoreza mbere y'iryo rushanwa.

Twabibutsa ko CAN itangira kuri iki Cyumweru tariki 9 Mutarama 2011, ubwo Cameroun yakiriye iri rushanwa iba ikina na Burika Faso saa kumi n'ebyiri z'umugoroba (18h) ku isaha yo mu Rwanda.




Source : https://www.kigalitoday.com/imikino-11/football/AFCON2021-CAF-yemeje-ko-amakipe-arimo-Covid-19-yakina-niba-asigaranye-abakinnyi-11-bazima

Post a Comment

0 Comments

Nature