Mu gihugu cy'Ubutaliyani uyu mugabo uri mu myaka ya 50 yagiye kwa muganga yiyambitse igipirapira ku kuboko kwe, yibwira ko badashobora kubibona. Ariko umuforomo ntiyemeye ko amuca mu rihumye aramutahura, niko kumuhamagarira polisi ihita imuta muri yombi. Uyu muforomo yabwiye ibinyamakuru byo muri icyo gihugu ko amaze gutahura ukuboko k'ugukorano k'uwo mugabo yari yambaye nyuma yaho yagize amakenga y'ukuntu uku kuboko kwari kumeze, maze akabona uruhu ari igipirapira kandi rukonje ukuntu, mbere n'ikibiribiri yumva koroshye cyane arebye asanga ni akaboko k'agakorano.
Uyo mugabo abonye ko yatahuwe, yagerageje guhendahenda uyu muforomokazi amusaba imbabazi, nk'uko ikinyamakuru la Repubblica cyabitangaje ariko uyu muforomokazi yahise amurega ku gipolisi. Igipolisi cy'akarere kabereyemo ibi kiri gukora iperereza y'ibi bintu byabereye mu karere ka Biella, mu majyaruguro y'Ubutaliyani, abategetsi b'ako karere bakaba bagaye igikorwa uyu mugabo yakoze.
Umuyobozi w'akarere ka Piedmont, Albert Cirio yacishije ubutumwa bwe ku rubuga rwa Facebook avuga ati: "Ibi bintu twavuga ko ari bibi cyane''. Avuga ko aya ari amanyanga "adashobora kwihanganirwa, aje gutesha agaciro abanyagihugu urebye ukuntu bitanze mu kubaho kwabo mu guhangana n'icyorezo cya Covid-19".
Uyu mugabo wakoze aya manyanga akaba yarahoze akora mu gisata cy'ubuvuzi, ariko akaba yari yarahagaritswe mu kazi kubera ko yari yaranze kwikingiza urukingo rwa Covid-19 kandi byari itegeko ku bakozi bose bo mu gisata c'ubuvuzi mu Butaliyani.
La Repubblica ivuga ko ibi atari ibintu byaje gutyo gusa kuko hari ubutumwa uyu mugabo yabanje gucisha ku rukuta rwe rwa Twitter yerekana igihimba cy'igikorano gifite igituza n'amaboko, akabwira abantu ko baramutse badashaka kwikingiza bagikoresha ndetse anababwira ko ugikeneye kigura ama euro 488 ku rubuga rwa Amazon rucuruza ibintu kuri murandasi. Nyuma y'aho uyu mugabo yafatanywe ukuboko k'ugukorano, yahise atabwa muri yombi kugeza ubu ategereje kuzitaba urukiko.
