Bamwe mu banyarwanda bakina hanze yarwo bari bamanutse mu kibuga mu mpera z'icyumweru gishize nk'aho muri Armenia bakinaga umunsi wa mbere wa shampiyona, Urartu na Nirisarike bitwara neza, ni mu gihe mu cyiciro cya kabiri muri Sweden nubwo Rafael York yatsinze ariko ikipe ye yanyagiwe.
Muri Kenya ku wa Gatanu w'icyumweru gishize, ntibyagendekeye neza Emery Mvuyekure na Tusker FC kuko iyi kipe yaje gutsindwa na City Stars 1-0. Wari umukino wa 3 wa Emery Mvuyekure yakinaga nyuma yo gukiruka imvune y'urutugu.
Kuri uwo munsi kandi, ntabwo wari umunsi munsi mwiza k'umutoza Cassa Mbungo Andre we na Bandari FC batsinzwe na Nzoia Sugar 4-1 mu mukino w'umunsi wa 27. Iyi shampiyona iyobowe na Tusker ifite 55, Bandari ni iya 9 ifite 40.
Ku wa Gatandatu tariki ya 31 Nyakanga, muri Norway bakinaga igikombe cy'igihugu, Strommen IF ya Buhake Clement yatsinzwe 3-0 na Kongsvinger, ni umukino uyu munyezamu yari yabanje ku ntebe y'abasimbura.
AFC Eskilstuna ya rutahizamu Rafael York wemeye gukinira Amavubi, ku wa Gatandatu yanyagiwe na Vasalund ibitego 4-2 mu mukino w'umunsi wa 2 wa shampiyona y'icyiciro cya kabiri muri Sweden. Uyu rutahizamu yinjiye mu kibuga ku munota wa 64 asimbura A. Ahl-Holmström wari watsinze igitego cya mbere, York na we yaje gutsinda icya 2 ku munota wa 90+5. AFC Eskilstuna iri ku mwanya wa 8 n'amanota 18, Landskrona niyo iyoboye urutonde na 28.
Muri Armenia mu cyiciro cya mbere, shampiyona yari yatangiye umwaka w'imikino wa 2021-2022, ku munsi w'ejo hashize ku Cyumweru, Urartu FC ya Nirisarike Salomon yatsinze Noravank 3-0, iyi kipe iri ku mwanya wa 2 n'amanota 3 inganya na Pyunik ya mbere na Ararat ya gatatu.
Mu Bubiligi ikipe ya Bizimana Djihad, KMSK Deinze ku wa Gatandatu w'icyumweru gishize yakinnye umukino wa gicuti na Oudenaarde iyitsinda ibitego 4-0, ni umukino uyu mukinnyi w'umunyarwanda yakinnye.
