Umukinnyi w'umunyarwanda ukinira ikipe ya Sandvikens IF muri Sweden, Yannick Mukunzi avuga ko we n'umuryango we ubu bameze neza, ni nyuma y'uko awukuye mu Rwanda bakimukira muri iki gihugu akoreramo akazi.
Nyuma y'umukino u Rwanda rwakinnye na Cameroun muri Mata 2021 wabereye muri Cameroun mu gushaka itike y'igikombe cy'Afurika cya 2021, Yannick Mukunzi yahise afata umugore we, Iribagiza Joy n'umuhungu babyaranye, Mukunzi Ethan bahita berekeza muri Sweden aho akina.
Mu kiganiro yahaye ikinyamakuru ISIMBI, Yannick Mukunzi yavuze ko ubu bameze neza nta kibazo bamaze kumenyera.
Ati'Umuryango waramenyereye umeze neza ubu ngubu, muri make ubuzima ni bwiza ndi kumwe nabo hano, ndishimye kandi ndanezerewe.'
Agaruka ku mvune yagize mu minsi ishize yatumye adakina imikino ya gicuti u Rwanda rwakinnye na Centrafrique mu ntangiriro z'uku kwezi yavuze ko yari yagize ikibazo cy'inyama yo mu itako(hamstring) ariko ubu ameze neza yatangiye no gukina.
Ati'mu mezi ashize ntabwo nari meze neza, nari nagize akabazo k'imvune, hamstring namaze hafi ukwezi ndi hanze y'ikibuga, ariko ubu meze neza natangiye no gukina imikino, maze gukina imikino nk'itatu kuva nagaruka kandi nayitwayemo neza nta kibazo.'
Yannick Mukunzi yinjiye muri Sandvikens IF mu ntangiriro za 2019, ayikinira imyaka 2 aho mu Kuboza 2020 yongereye amasezerano y'imyaka 2.
